लोकलमधून उतरण्यावरून झालेल्या वादातून प्राध्यापकाची हत्या; आरोपीला २४ तासांत अटक
मुंबई, २६ जानेवारी २०२६ | मॅक्स मंथन डेली न्यूज:
मुंबई : मुंबईच्या धावत्या लोकलमध्ये शनिवारी संध्याकाळी किरकोळ वादातून झालेल्या प्राध्यापकाच्या हत्येप्रकरणी लोहमार्ग पोलिसांनी (GRP) रविवारी आरोपीला बेड्या ठोकल्या आहेत. ओमकार शिंदे असे अटक करण्यात आलेल्या आरोपीचे नाव असून, अवघ्या २४ तासांत पोलिसांनी त्याला शोधून काढले आहे.
विलेपार्ले येथील प्रसिद्ध ‘नरसी मोनजी’ (NM) कॉलेजमध्ये गणित आणि सांख्यिकी विषयाचे शिक्षक असलेले आलोक कुमार सिंह (३३) हे शनिवारी दुपारी सव्वा पाचच्या सुमारास कॉलेज सुटल्यावर मालाडला आपल्या घरी जाण्यासाठी बोरीवली लोकलने निघाले होते. संध्याकाळी ६ च्या सुमारास गाडी मालाड स्टेशनवर येत असताना, डब्यातून उतरण्याच्या कारणावरून त्यांचा एका प्रवाशाशी (आरोपी ओमकार शिंदे) वाद झाला.
हा वाद इतका टोकाला गेला की, आरोपीने रागाच्या भरात आपल्याकडील तीक्ष्ण शस्त्राने आलोक यांच्या पोटावर खोल वार केला आणि गर्दीचा फायदा घेऊन तो पळून गेला. रक्ताच्या थारोळ्यात पडलेल्या आलोक यांना तातडीने कांदिवलीच्या बाबासाहेब आंबेडकर रुग्णालयात नेण्यात आले, मात्र उपचारापूर्वीच त्यांचा मृत्यू झाला.
आलोक सिंह हे त्यांच्या कॉलेजमध्ये अत्यंत नम्र आणि शांत स्वभावाचे शिक्षक म्हणून ओळखले जात होते. “ते कधीही कोणाशी भांडले नाहीत, उलट इतरांचे वाद सोडवण्यासाठी ते पुढाकार घ्यायचे,” अशी भावना त्यांच्या सहकाऱ्यांनी व्यक्त केली आहे. आलोक यांचा विवाह अवघ्या दोन वर्षांपूर्वी झाला होता. त्यांचे वडील दिल्लीत ज्येष्ठ भाजप नेते राजनाथ सिंह यांच्याकडे कार्यरत असल्याचे समजते.
घटनेचे गांभीर्य लक्षात घेऊन जीआरपीने सीसीटीव्ही फुटेज आणि तांत्रिक तपासाच्या आधारे आरोपी ओमकार शिंदेचा माग काढला आणि त्याला अटक केली. भरदिवसा आणि गर्दीच्या वेळी धावत्या ट्रेनमध्ये झालेल्या या खुनामुळे मुंबईकरांच्या सुरक्षिततेचा प्रश्न पुन्हा एकदा ऐरणीवर आला आहे.
© २०२६ मॅक्स मंथन डेली न्यूज. सर्व हक्क राखीव.
