पुण्याचे सुधीर हिरेमठ यांच्यासह राज्यातील ७५ पोलीस अधिकारी राष्ट्रपती पदकाने सन्मानित; पिंपरी-चिंचवडच्या वीठ्ठल कुबडे यांनाही बहुमान

पुणे/पिंपरी प्रतिनिधी आकाश कांबळे, २६ जानेवारी २०२६ | मॅक्स मंथन डेली न्यूज:

पुणे/पिंपरी : प्रजासत्ताक दिनाच्या पूर्वसंध्येला केंद्र सरकारकडून जाहीर करण्यात येणाऱ्या मानाच्या ‘राष्ट्रपती पोलीस पदकां’मध्ये पुणे आणि पिंपरी-चिंचवडमधील पोलीस अधिकाऱ्यांनी मोठे यश संपादन केले आहे. राज्य गुन्हे अन्वेषण विभागाचे (CID) विशेष पोलीस महानिरीक्षक सुधीर हिरेमठ यांच्यासह राज्यातील ७५ पोलीस अधिकारी आणि कर्मचाऱ्यांना विविध श्रेणीतील पदके जाहीर झाली आहेत.

• सुधीर हिरेमठ (विशेष पोलीस महानिरीक्षक, राज्य CID): हिरेमठ यांना त्यांच्या उल्लेखनीय सेवेबद्दल (Meritorious Service) पदक जाहीर झाले आहे. त्यांनी यापूर्वी सीबीआय, पिंपरी-चिंचवड आणि राज्यातील विविध महत्त्वाच्या युनिट्समध्ये सेवा दिली आहे.

• विठ्ठल कुबडे (सहाय्यक पोलीस आयुक्त, पिंपरी विभाग): पिंपरी-चिंचवड आयुक्तालयांतर्गत कार्यरत असलेल्या कुबडे यांना ‘विशिष्ट सेवेसाठी राष्ट्रपती पदक’ (Distinguished Service Medal) जाहीर झाले आहे. १५ सप्टेंबर १९९३ रोजी पोलीस दलात रुजू झालेल्या कुबडे यांनी नक्षलग्रस्त भागातही मोलाची कामगिरी केली असून त्यांना आतापर्यंत १,२०० हून अधिक बक्षिसे मिळाली आहेत.

• अमोल फडतरे (पोलीस निरीक्षक, चिखली): त्यांना शौर्य पदक (Gallantry Medal) देऊन सन्मानित करण्यात येणार आहे. गडचिरोली येथील नक्षलविरोधी मोहिमेत (C-60 युनिट) त्यांनी दाखवलेल्या अचाट धैर्याबद्दल त्यांना हे दुसऱ्यांदा राष्ट्रपती पदक मिळत आहे.

• दयानंद गावडे (पोलीस उपअधीक्षक, लाचलुचपत प्रतिबंधक विभाग, पुणे): उल्लेखनीय सेवेबद्दल पदक.

• अविनाश शिळीमकर (वरिष्ठ पोलीस निरीक्षक, स्थानिक गुन्हे शाखा, पुणे ग्रामीण): उल्लेखनीय सेवेबद्दल पदक.

• प्रदीप सावंत (सहाय्यक पोलीस उपनिरीक्षक, SRPF गट १, पुणे): विशिष्ट सेवेसाठी पदक.

• राजेंद्र धनगर आणि सुनील लांडे (हवालदार, येरवडा कारागृह): कारागृह सुधार सेवांमधील योगदानाबद्दल पदक.

यंदा महाराष्ट्राला मिळालेल्या ७५ पदकांपैकी ३१ पदके एकट्या गडचिरोली जिल्ह्याला मिळाली आहेत. नक्षलवादाविरुद्धच्या लढ्यात दाखवलेल्या असीम शौर्याबद्दल गडचिरोलीच्या जवानांचा केंद्र सरकारने गौरव केला आहे. यामध्ये ३१ शौर्य पदके, ४ विशिष्ट सेवा पदके आणि ४० उल्लेखनीय सेवा पदकांचा समावेश आहे.

प्रजासत्ताक दिनानिमित्त या सर्व शूर आणि कर्तव्यदक्ष अधिकाऱ्यांचे सर्व स्तरांतून अभिनंदन केले जात आहे.

© २०२६ मॅक्स मंथन डेली न्यूज. सर्व हक्क राखीव.