गिरीश महाजन यांच्या ‘त्या’ विधानाचा पुण्यात तीव्र निषेध; वंचित बहुजन आघाडीचे बंडगार्डन पोलीस स्टेशनसमोर ठिय्या आंदोलन

पुणे/पिंपरी, प्रतिनिधी: बालाजी नवले, २७ जानेवारी २०२६ | मॅक्स मंथन डेली न्यूज:

पुणे : नाशिक येथील शासकीय ध्वजारोहण कार्यक्रमात भाषण करताना राज्याचे ग्रामविकास मंत्री गिरीश महाजन यांनी भारतीय संविधानाचे शिल्पकार डॉ. बाबासाहेब आंबेडकर यांच्या नावाचा उल्लेख टाळल्याने राज्यात संतापाची लाट उसळली आहे. या घटनेचे तीव्र पडसाद पुण्यात उमटले असून, वंचित बहुजन आघाडीच्या वतीने आज बंडगार्डन पोलीस स्टेशनसमोर जोरदार निदर्शने करण्यात आली.

प्रजासत्ताक दिनीच संविधानाच्या शिल्पकाराचा विसर पडणे ही अनावधानाने झालेली चूक नसून, ही भाजपची विशिष्ट वैचारिक मानसिकता आहे, अशी घणाघाती टीका आंदोलनादरम्यान करण्यात आली. नाशिकमध्ये एका महिला कर्मचाऱ्याने महाजन यांना यावरून जाब विचारल्यानंतर आता पुण्यात राजकीय वातावरण तापले असून गिरीश महाजन यांच्या राजीनाम्याची मागणी जोर धरत आहे.

या आंदोलनाचे नेतृत्व वंचित बहुजन आघाडीच्या शहर पदाधिकाऱ्यांनी केले. यामध्ये खालील मान्यवर सहभागी झाले होते:

• अरविंद तायडे: शहराध्यक्ष, वंचित बहुजन आघाडी, पुणे.

• सागर आल्हाट: शहराध्यक्ष, वंचित बहुजन युवा आघाडी, पुणे.

• अविनाश लहाडे: उपाध्यक्ष, वंचित बहुजन युवा आघाडी, पुणे.

• अक्षय कांबळे: पुणे शहर संघटन, वंचित बहुजन आघाडी.

आंदोलनकर्त्यांनी गिरीश महाजन आणि महायुती सरकारविरोधात जोरदार घोषणाबाजी करत परिसर दणाणून सोडला. शहराध्यक्ष अरविंद तायडे यांनी मागणी केली की, डॉ. बाबासाहेब आंबेडकरांचा अवमान केल्याप्रकरणी गिरीश महाजन यांच्यावर अ‍ॅट्रॉसिटी कायद्यांतर्गत गुन्हा दाखल करून त्यांची मंत्रिमंडळातून तात्काळ हकालपट्टी करण्यात यावी.

युवा शहराध्यक्ष सागर आल्हाट यांनी इशारा दिला की, सरकारने यावर त्वरित कठोर पावले उचलली नाहीत, तर येत्या काळात संपूर्ण पुणे शहरात तीव्र आंदोलन छेडले जाईल. आंदोलनानंतर बंडगार्डन पोलीस स्टेशनच्या वरिष्ठ निरीक्षकांना मागण्यांचे निवेदन सादर करण्यात आले. सदर आंदोलन करता पुणे शहरातील वंचित बहुजन आघाडीचे सर्व कार्यकर्ते व आंदोलन करते उपस्थित होते.

© २०२६ मॅक्स मंथन डेली न्यूज. सर्व हक्क राखीव.