शिक्षण क्षेत्रातील मोठी बातमी: केंद्रप्रमुख पदासाठी ३ व ४ फेब्रुवारीला ऑनलाइन परीक्षा; प्रवेशपत्र उपलब्ध

पिंपरी प्रतिनिधी आकाश कांबळे, ३० जानेवारी २०२६ | मॅक्स मंथन डेली न्यूज:

पुणे/पिंपरी: महाराष्ट्र राज्यातील सर्व जिल्हा परिषदांमध्ये कार्यरत असलेल्या प्राथमिक शिक्षकांसाठी आनंदाची बातमी आहे. केंद्रप्रमुख पदावर नियुक्ती देण्यासाठी आयोजित करण्यात आलेली “समूह साधन केंद्र समन्वयक केंद्र प्रमुख मर्यादित विभागीय स्पर्धा परीक्षा २०२५” आता ऑनलाइन पद्धतीने पार पडणार आहे. महाराष्ट्र राज्य परीक्षा परिषदेच्या वतीने ३ आणि ४ फेब्रुवारी २०२६ रोजी या परीक्षेचे आयोजन करण्यात आले आहे.

ही परीक्षा प्रत्येक दिवशी तीन सत्रांमध्ये घेतली जाणार आहे. परीक्षेसाठी पात्र असलेल्या उमेदवारांची प्रवेशपत्रे (Admit Cards) २९ जानेवारीपासून परीक्षा परिषदेच्या अधिकृत संकेतस्थळावर उपलब्ध करून देण्यात आली आहेत.

• अधिकृत संकेतस्थळ: www.mscepune.in

• प्रवेशपत्र डाउनलोड करण्याची पद्धत: उमेदवारांनी संकेतस्थळावर जाऊन आपला ‘लॉगिन आयडी’ (रजिस्ट्रेशन नंबर) आणि ‘पासवर्ड’ (जन्मदिनांक) वापरून प्रवेशपत्र डाउनलोड करावे.

उमेदवारांना प्रवेशपत्र डाउनलोड करताना काही तांत्रिक अडचणी येत असल्यास प्रशासनाने मदतीसाठी हेल्पलाईन क्रमांक जाहीर केले आहेत:

• हेल्पलाईन नंबर: १८००२२२३६६ / १८००१०३४५६६

• तक्रार नोंदवण्यासाठी लिंक: http://cgrs.ibps.in/

महाराष्ट्र राज्य परीक्षा परिषदेच्या आयुक्त अनुराधा ओक यांनी प्रसिद्धी पत्रकाद्वारे सर्व संबंधित परीक्षार्थी उमेदवारांनी वेळेत प्रवेशपत्र डाउनलोड करून घेण्याचे आणि परीक्षेच्या नियमांचे पालन करण्याचे आवाहन केले आहे. या परीक्षेमुळे जिल्हा परिषदेच्या शाळांमधील केंद्रप्रमुखांच्या रिक्त जागा भरण्यास मदत होणार असून, अनुभवी शिक्षकांना पदोन्नतीची संधी मिळणार आहे.

सर्व परीक्षार्थी उमेदवारांनी आवेदनपत्रावरील आपला रजिस्ट्रेशन नंबर आणि जन्मतारीख अचूक टाकून आपले प्रवेशपत्र प्राप्त करून घ्यावे, असेही परिषदेद्वारे स्पष्ट करण्यात आले आहे.

© २०२६ मॅक्स मंथन डेली न्यूज. सर्व हक्क राखीव.