महापालिकेच्या नूतन इमारतीला अजितदादांचे नाव द्या; काँग्रेस नेते विशाल जाधव यांची प्रशासकांकडे आग्रही मागणी

पिंपरी प्रतिनिधी आकाश कांबळे, ३० जानेवारी २०२६ | मॅक्स मंथन डेली न्यूज:

पिंपरी : “पिंपरी-चिंचवड शहराचा कायापालट करणारे आधुनिक शिल्पकार दिवंगत उपमुख्यमंत्री अजितदादा पवार यांच्या कार्याचा यथोचित गौरव होणे ही काळाची गरज आहे. त्यासाठी महानगरपालिकेच्या नवीन प्रशासकीय इमारतीला त्यांचे नाव देण्यात यावे आणि शहरात त्यांचा भव्य पूर्णाकृती पुतळा उभारला जावा,” अशी आग्रही मागणी काँग्रेसचे नेते व प्रभाग क्रमांक २८ चे अधिकृत उमेदवार विशाल अनंतराव जाधव यांनी केली आहे.

विशाल जाधव यांनी आज महापालिका आयुक्तांची भेट घेऊन त्यांना यासंदर्भातील मागणीचे निवेदन सादर केले. पिंपरी-चिंचवडला जागतिक विकासाच्या नकाशावर आणण्यासाठी अजितदादांनी घेतलेले कष्ट अतुलनीय आहेत. आयटी हबपासून ते ऑटोमोबाईल हबपर्यंत शहराची झालेली प्रगती त्यांच्या कल्पक नेतृत्वाचे फळ असल्याचे जाधव यांनी यावेळी नमूद केले.

• नामकरण: नवीन महापालिका इमारतीचे नामकरण ‘दिवंगत उपमुख्यमंत्री अजितदादा पवार भवन’ असे करण्यात यावे.

• स्मारक: शहरातील नागरिकांच्या वतीने कृतज्ञता व्यक्त करण्यासाठी शहराच्या मध्यवर्ती ठिकाणी दादांचा भव्य पूर्णाकृती पुतळा उभारला जावा.

• कृतज्ञता: अजितदादांच्या दूरदृष्टीमुळेच शहराची ओळख आज ‘बेस्ट सिटी’ म्हणून झाली आहे, त्याबद्दल ही आदरांजली ठरेल.

यावेळी बोलताना विशाल जाधव म्हणाले की, “अजितदादा पवार हे पहिल्यांदा बारामती लोकसभा मतदारसंघाचे काँग्रेसचे अधिकृत उमेदवार म्हणून निवडून आले होते. राजकारणापलीकडे जाऊन ज्या नेत्याने हे शहर घडवले, त्यांच्या नावाचा सन्मान होणे आवश्यक आहे. या मागणीचा सकारात्मक विचार न झाल्यास आगामी काळात तीव्र लोकभावना व्यक्त केल्या जातील.”

अजितदादांच्या निधनानंतर शहरात विविध स्तरातून त्यांना आदरांजली वाहिली जात असताना, काँग्रेस नेत्याने केलेली ही मागणी आता चर्चेचा विषय ठरली आहे.

© २०२६ मॅक्स मंथन डेली न्यूज. सर्व हक्क राखीव.