महापौर अर्ज भरताना भाजप शहराध्यक्ष बापू काटे ‘गायब’; शीतल शिंदेंचाही नकार, शर्मिला बाबर यांचा उपमहापौरपदासाठी अर्ज
पिंपरी प्रतिनिधी आकाश कांबळे, २ फेब्रुवारी २०२६ | मॅक्स मंथन डेली न्यूज:
पिंपरी-चिंचवड : पिंपरी-चिंचवड महानगरपालिकेत भारतीय जनता पक्षाने एकहाती सत्ता मिळवली असली, तरी महापौर आणि उपमहापौर पदाचे उमेदवारी अर्ज भरताना भाजपमधील अंतर्गत गटबाजी चव्हाट्यावर आली आहे. महापौर पदासाठी रवी लांडगे यांचा अर्ज भरताना शहराध्यक्ष शत्रुघ्न उर्फ बापू काटे यांची अनुपस्थिती आणि ज्येष्ठ नगरसेवक शीतल शिंदे यांनी उपमहापौर पद नाकारल्याने महापालिका वर्तुळात मोठी खळबळ उडाली आहे.
भाजपच्या विजयात महत्त्वाचा वाटा असलेले आणि दिवंगत आमदार लक्ष्मणभाऊ जगताप यांचे कट्टर समर्थक मानले जाणारे शहराध्यक्ष बापू काटे या महत्त्वपूर्ण प्रसंगी अनुपस्थित राहिले. सत्तेच्या केंद्रस्थानी असलेल्या शहराध्यक्षांच्या अनुपस्थितीमध्येच महापौर व उपमहापौर पदाचे अर्ज दाखल करण्यात आल्याने भाजपमध्ये सर्व काही आलबेल नसल्याचे चित्र स्पष्ट झाले असून चर्चेला उधाण आले आहे.
सलग तीनवेळा भाजपच्या चिन्हावर निवडून आलेले निष्ठावान नगरसेवक शीतल उर्फ विजय शिंदे यांनी उपमहापौर पदाचा अर्ज भरण्यास नकार दिला आणि ते सभागृह सोडून निघून गेले. ज्येष्ठतेचा विचार करून महापौर पद मिळावे अशी त्यांची अपेक्षा होती, मात्र उपमहापौर पद देण्यात आल्याने त्यांनी नाराजी व्यक्त केली. या नाट्यमय घडामोडीनंतर, भाजपकडून उपमहापौर पदासाठी आता शर्मिला राजू बाबर यांचा नामनिर्देशन अर्ज दाखल करण्यात आला आहे.
शहराध्यक्षांच्या अनुपस्थितीत चिंचवड विधानसभेचे आमदार शंकर जगताप आणि विधान परिषदेच्या आमदार उमाताई खापरे यांनीच अर्जाच्या प्रक्रियेत पुढाकार घेतल्याचे पाहायला मिळाले. यावेळी भोसरीचे आमदार महेश लांडगे, आमदार अमित गोरखे, नवनिर्वाचित गटनेते प्रशांत शितोळे आणि इतर पदाधिकारी उपस्थित होते. नगरसचिव मुकेश कोळप यांनी महापौर पदासाठी रवी लांडगे आणि उपमहापौर पदासाठी शर्मिला बाबर यांचे अर्ज स्वीकारले.
महापौर आणि उपमहापौर निवडीसाठी येत्या ६ फेब्रुवारीला विशेष सर्वसाधारण सभा आयोजित करण्यात आली आहे. या सभेत अधिकृतपणे ही पदे घोषित केली जातील. मात्र, सत्तेच्या पहिल्याच पायरीवर उफाळून आलेल्या या गटबाजीमुळे आगामी काळात पक्षांतर्गत समीकरणे कशी बदलतात, याकडे सर्वांचे लक्ष लागले आहे.
© २०२६ मॅक्स मंथन डेली न्यूज. सर्व हक्क राखीव.
