झोपडपट्टी सेवाकर आता एका क्लिकवर! महापालिकेकडून ‘क्युआर कोड’द्वारे ऑनलाईन पेमेंट सुविधा सुरू; नागरिकांचा वेळ आणि श्रम वाचणार

पिंपरी प्रतिनिधी शाम सोनवणे, ११ फेब्रुवारी २०२६ | मॅक्स मंथन डेली न्यूज:

पिंपरी : पिंपरी चिंचवड महानगरपालिकेने डिजिटल इंडियाच्या दिशेने आणखी एक पाऊल टाकले आहे. महापालिकेच्या झोपडपट्टी निर्मूलन व पुनर्वसन विभागामार्फत आकारला जाणारा सेवाकर आता नागरिकांना घरबसल्या ऑनलाईन पद्धतीने भरता येणार आहे. यासाठी बिलावर देण्यात आलेल्या क्युआर कोडची (QR Code) मदत होणार असून, यामुळे नागरिकांना रांगेत उभे राहण्याची गरज भासणार नाही.

समाज विकास विभागाअंतर्गत कार्यरत असणाऱ्या महिला बचत गटांच्या प्रतिनिधींमार्फत झोपडपट्टीधारकांना सेवाकर बिलांचे वाटप करण्यात आले आहे. या मोहिमेमुळे महापालिकेचा महसूल वाढण्यास मदत होणार असून, नागरिकांना सुलभ सेवा उपलब्ध करून देण्यात आली आहे. अतिरिक्त आयुक्त तृप्ती सांडभोर आणि उपायुक्त अण्णा बोदडे यांच्या देखरेखीखाली ही प्रक्रिया राबविण्यात येत आहे.

१. आपल्या बिलाच्या उजव्या बाजूला खाली दिलेला QR Code मोबाईलने स्कॅन करा.

२. स्कॅन केल्यानंतर स्क्रीनवर तुमचे नाव आणि बिलाची रक्कम दिसेल, ती तपासून घ्या.

३. माहिती बरोबर असल्यास “Pay Bill Here” या बटनावर क्लिक करा.

४. त्यानंतर UPI (GPay, PhonePe), क्रेडिट/डेबिट कार्ड किंवा नेट बँकिंगद्वारे पेमेंट पूर्ण करा.

या सुविधेचे नियोजन महापौर रवि लांडगे, उपमहापौर शर्मिला बाबर आणि आयुक्त श्रावण हर्डीकर यांच्या मार्गदर्शनाखाली करण्यात आले आहे. शहराच्या कानाकोपऱ्यातील झोपडपट्टीवासियांना आधुनिक सुविधा मिळवून देणे, हा यामागचा मुख्य उद्देश आहे.

“डिजिटल सोयी वाढविणे हे आमचे प्राधान्य आहे. ऑनलाईन सुविधेमुळे नागरिकांना घरबसल्या कर भरणे शक्य होणार असून, जास्तीत जास्त नागरिकांनी या पारदर्शक सुविधेचा लाभ घ्यावा.”

– रवि लांडगे, महापौर, पिंपरी चिंचवड महापालिका

“क्युआर कोडद्वारे काही सेकंदांतच भरणा करता येणार आहे. महिला बचत गटांच्या माध्यमातून ही सोय प्रभावीपणे पोहोचवण्यात आली असून, लाभार्थ्यांनी वेळेत कराचा भरणा करावा.”

– अण्णा बोदडे, उपायुक्त, पिंपरी चिंचवड महापालिका

© २०२६ मॅक्स मंथन डेली न्यूज. सर्व हक्क राखीव.