शिवरायांचा जयघोष आता नेपाळमध्येही! काठमांडू येथे विविध देशांच्या राजदूतांच्या उपस्थितीत शिवजयंती उत्साहात साजरी

पिंपरी चिंचवड प्रतिनिधी बालाजी नवले, २२ फेब्रुवारी २०२६ | मॅक्स मंथन डेली न्यूज

पिंपरी : छत्रपती शिवाजी महाराज यांचे विचार केवळ भारतापुरते मर्यादित न राहता आता जागतिक स्तरावर पोहोचत आहेत. नेपाळची राजधानी काठमांडू (थामेल) येथे इरा एज्युकेशन सोसायटी आर्वी (ता. भोर), तुळजाई फाउंडेशन पिंपरी-चिंचवड आणि ह्युमन हार्मनी यांच्या संयुक्त विद्यमाने शिवजयंती मोठ्या उत्साहात साजरी करण्यात आली. या आंतरराष्ट्रीय सोहळ्यामुळे शिवरायांची यशोगाथा आता विविध राष्ट्रांतील नागरिकांपर्यंत पोहोचली आहे.

या ऐतिहासिक कार्यक्रमाला केवळ भारत किंवा नेपाळमधीलच नव्हे, तर जगभरातील विविध देशांचे प्रतिनिधी उपस्थित होते. यामध्ये:

• एच. ई. मोहन श्रेष्ठ: फ्रान्स, जपान, यूएई आणि थायलंडचे राजदूत तथा युनेस्को प्रतिनिधी.

• याम तिवारी: नेपाळचे पंतप्रधान कार्यालयीन सचिव.

• डॉ. प्रसन्न देशमुख: अध्यक्ष, इरा एज्युकेशन सोसायटी, आर्वी.

• शिवाजी घोडे: अध्यक्ष, तुळजाई फाउंडेशन तथा ज्येष्ठ पत्रकार, पिंपरी-चिंचवड.

  यांच्यासह डॉ. विठोबा तळे (JSPM कॉलेज), प्रेमलता साळी आणि मोहन चिनी यांची प्रमुख उपस्थिती होती.

कार्यक्रमात छत्रपती शिवाजी महाराजांच्या प्रतिमेचे पूजन करण्यात आले. यावेळी डॉ. प्रसन्न देशमुख यांनी शिवरायांच्या पराक्रमाची आणि व्यवस्थापन कौशल्याची यशोगाथा मांडली. “शत्रूचे प्रचंड सैन्य असताना गनिमी काव्याचा वापर करून स्वराज्याची निर्मिती आणि सर्व समाजाला सोबत घेऊन जाण्याची कला आजही आधुनिक जगासाठी आदर्श आहे,” असे त्यांनी नमूद केले. विशेषतः शिवरायांनी स्त्रियांना दिलेला मान आणि सन्मान या गोष्टींनी उपस्थितांना भारावून टाकले.

काठमांडू येथे झालेल्या या सोहळ्यात भारत आणि नेपाळसह मलेशिया, सिंगापूर, चीन आणि बांगलादेश या देशांतील नागरिकही मोठ्या उत्साहात सहभागी झाले होते. शिवरायांचे विचार प्रेरणादायी असल्याने दरवर्षी नेपाळसह विविध राष्ट्रांमध्ये शिवजयंती साजरी करण्याचा संकल्प यावेळी करण्यात आला.

ह्युमन हार्मनी संस्थेचे संचालक सुरज गायकवाड यांनी या उपक्रमासाठी पुढाकार घेतला, तर आभार प्रदर्शन श्रीमती नमिता घीमरे यांनी मानले.

© २०२६ मॅक्स मंथन डेली न्यूज. सर्व हक्क राखीव.