महात्मा फुले व डॉ. बाबासाहेब आंबेडकर जयंतीनिमित्त ‘विचार प्रबोधन पर्व’; नियोजनासाठी २६ फेब्रुवारीला महापौरांच्या उपस्थितीत बैठक
पिंपरी प्रतिनिधी आकाश कांबळे, २४ फेब्रुवारी २०२६ | मॅक्स मंथन डेली न्यूज:
पिंपरी : पिंपरी-चिंचवड महानगरपालिकेच्या वतीने दरवर्षीप्रमाणे यंदाही क्रांतीसूर्य महात्मा जोतीराव फुले आणि भारतरत्न डॉ. बाबासाहेब आंबेडकर यांच्या जयंतीनिमित्त ‘विचार प्रबोधन पर्व’ मोठ्या उत्साहात साजरे करण्यात येणार आहे. या भव्य उपक्रमाच्या नियोजनासाठी आणि विविध सामाजिक संघटनांशी विचारविनिमय करण्यासाठी विशेष बैठकीचे आयोजन करण्यात आले आहे.
ही बैठक गुरुवार, दिनांक २६ फेब्रुवारी २०२६ रोजी दुपारी ३ वाजता पिंपरी येथील महापालिकेच्या मुख्य प्रशासकीय इमारतीमधील दिवंगत माजी महापौर मधुकरराव पवळे सभागृहात संपन्न होणार आहे.
महापौर रवि लांडगे यांच्या अध्यक्षतेखाली होणाऱ्या या बैठकीत जयंती उत्सवाचे स्वरूप, व्याख्याने, सांस्कृतिक कार्यक्रम आणि प्रबोधनात्मक उपक्रमांची आखणी केली जाणार आहे. महापालिकेचे वरिष्ठ अधिकारी आणि संबंधित विभागाचे प्रमुख या बैठकीस उपस्थित राहून नियोजनाचा आढावा घेणार आहेत.
शहरातील सामाजिक, शैक्षणिक आणि सांस्कृतिक चळवळीत काम करणाऱ्या विविध संघटनांच्या प्रतिनिधींनी या बैठकीस उपस्थित राहून आपल्या सूचना मांडव्या, असे आवाहन महानगरपालिकेच्या वतीने करण्यात आले आहे. क्रांतीसूर्य महात्मा फुले आणि डॉ. बाबासाहेब आंबेडकर यांचे विचार जनमानसापर्यंत प्रभावीपणे पोहोचवण्यासाठी हे ‘विचार प्रबोधन पर्व’ महत्त्वपूर्ण ठरणार आहे.
© २०२६ मॅक्स मंथन डेली न्यूज. सर्व हक्क राखीव.
