पिंपरी-चिंचवडमध्ये रंगणार ‘मराठी भाषा गौरव दिन’; ज्येष्ठ तमाशा कलावंत पद्मश्री रघुवीर खेडकर यांचा नागरी सत्कार; सांस्कृतिक कार्यक्रमांची मेजवानी

पिंपरी प्रतिनिधी आकाश कांबळे, २५ फेब्रुवारी २०२६ | मॅक्स मंथन डेली न्यूज:

पिंपरी : मराठी भाषेचे जतन, संवर्धन आणि तिची समृद्ध सांस्कृतिक परंपरा साजरी करण्यासाठी पिंपरी-चिंचवड महानगरपालिकेच्या वतीने २५ आणि २७ फेब्रुवारी २०२६ रोजी भरगच्च कार्यक्रमांचे आयोजन करण्यात आले आहे. या महोत्सवाचे मुख्य आकर्षण म्हणजे भारत सरकारने पद्मश्री पुरस्कार जाहीर केलेले ज्येष्ठ तमाशा कलावंत रघुवीर तुकाराम खेडकर यांचा होणारा नागरी सन्मान. महापौर रवि लांडगे यांच्या हस्ते या कार्यक्रमांचे उद्घाटन होणार असून शहरातील रसिक प्रेक्षकांसाठी ही पर्वणी ठरणार आहे.

महोत्सवाची सुरुवात बुधवारी (२५ फेब्रुवारी) ऑटो क्लस्टर सभागृहात होणार आहे. सकाळी ११ वाजता प्रसार माध्यम प्रतिनिधींसाठी “पत्रकारिता क्षेत्रात एआय (कृत्रिम बुद्धिमत्ता) तंत्रज्ञानाचा उपयोग” या विषयावर विशेष व्याख्यान आयोजित केले आहे. सिंबायोसिसचे प्रा. सुशोभन पाटणकर यामध्ये मार्गदर्शन करतील. आधुनिक काळात मराठी पत्रकारिता तंत्रज्ञानाशी कशी जोडावी, हा यामागचा मुख्य उद्देश आहे.

शुक्रवारी, २७ फेब्रुवारी रोजी प्रा. रामकृष्ण मोरे प्रेक्षागृहात सकाळी १० वाजल्यापासून विविध कार्यक्रमांची रेलचेल असेल:

• नागरी सन्मान: ज्येष्ठ तमाशा कलावंत रघुवीर तुकाराम खेडकर यांचा विशेष सत्कार.

• मार्गदर्शन: “तमाशा – मराठी भाषा संवर्धन करणारी महाराष्ट्राची सांस्कृतिक लोकचळवळ” या विषयावर खेडकर यांचे व्याख्यान.

• सांस्कृतिक आविष्कार: दुपारी १२ वाजता लोकशाहीर विठ्ठल उमप थिएटरतर्फे “माय मराठीची गौरवगाथा” हा कार्यक्रम संदेश विठ्ठल उमप आणि शाहीर पृथ्वीराज माळी सादर करतील.

• कविसंमेलन: दुपारी ३ वाजता राज अहेरराव यांच्या अध्यक्षतेखाली स्थानिक कवींचे संमेलन.

• परिसंवाद: दुपारी ४ वाजता “अभिजात मराठी भाषेचे वैभव” विषयावर अरूण बोऱ्हाडे, प्रकाश निर्मल आणि डॉ. धनंजय भिसे चर्चा करतील.

• सांगता सोहळा: सायंकाळी ६ वाजता विजय सरतापे आणि सहकाऱ्यांचा “आवाज लोकगीतांचा… गंध मराठी मातीचा…” हा बहारदार कार्यक्रम पार पडेल.

या सोहळ्याला केंद्रीय राज्यमंत्री मुरलीधर मोहोळ, उपमुख्यमंत्री सुनेत्रा पवार, उच्च व तंत्रशिक्षण मंत्री चंद्रकांत पाटील, नीलम गोऱ्हे, अण्णा बनसोडे, सुप्रिया सुळे, श्रीरंग आप्पा बारणे, डॉ. अमोल कोल्हे, महेश लांडगे, शंकर जगताप आणि आयुक्त श्रावण हर्डीकर यांच्यासह अनेक मान्यवर उपस्थित राहणार आहेत.

मराठी भाषेचे वैभव अनुभवण्यासाठी पिंपरी-चिंचवडमधील नागरिकांनी मोठ्या संख्येने उपस्थित राहावे, असे आवाहन विशेष अधिकारी किरण गायकवाड यांनी केले आहे.

© २०२६ मॅक्स मंथन डेली न्यूज. सर्व हक्क राखीव.