नोकरीच्या आमिषाला बळी पडू नका! महापालिकेत सध्या कोणतीही भरती प्रक्रिया सुरू नाही; बनावट नियुक्तीपत्रांपासून सावध राहण्याचे प्रशासनाचे आवाहन

पिंपरी प्रतिनिधी आकाश कांबळे, २५ फेब्रुवारी २०२६ | मॅक्स मंथन डेली न्यूज:

पिंपरी : पिंपरी-चिंचवड महानगरपालिकेच्या नावाने सध्या समाजमाध्यमांवर नोकरीची बनावट नियुक्तीपत्रे आणि उमेदवारांच्या खोट्या याद्या फिरत असल्याने खळबळ उडाली आहे. या पार्श्वभूमीवर, “महानगरपालिकेत सध्या कोणत्याही पदासाठी भरती प्रक्रिया सुरू नाही,” असे स्पष्टीकरण देत नागरिकांनी फसवणूक टाळण्याचे आवाहन महापालिका प्रशासनाने केले आहे.

गेल्या काही दिवसांपासून व्हॉट्सॲप आणि फेसबुकसारख्या प्लॅटफॉर्मवर महापालिकेत भरती असल्याचे भासवून सुशिक्षित बेरोजगारांची दिशाभूल केली जात असल्याचे समोर आले आहे.

प्रशासन विभागाकडे प्राप्त झालेल्या तक्रारींनुसार, काही टोळ्या महापालिकेच्या नावाचा आणि लोगोचा गैरवापर करून बनावट नियुक्तीपत्रे प्रसिद्ध करत आहेत. या बदल्यात तरुणांकडून पैसे उकळण्याचे प्रकार घडण्याची शक्यता नाकारता येत नाही. महापालिकेने अद्याप भरतीबाबत कोणताही अधिकृत आदेश किंवा जाहिरात प्रसिद्ध केलेली नसल्याचे प्रशासनाने स्पष्ट केले आहे.

नोकरीच्या शोधात असलेल्या तरुणांनी कोणत्याही मध्यस्थावर किंवा सोशल मीडियावरील मेसेजवर विश्वास ठेवू नये. महापालिकेच्या भरतीबाबतची सर्व अधिकृत माहिती केवळ www.pcmcindia.gov.in या अधिकृत संकेतस्थळावरच प्रसिद्ध केली जाते.

“नागरिकांनी अशा कोणत्याही अप्रमाणित माहितीवर विश्वास ठेवू नये. महापालिकेच्या नावाने कोणी पैशांची मागणी करत असेल तर त्याची तक्रार त्वरित प्रशासनाकडे किंवा पोलिसांकडे करावी. अधिकृत माहितीसाठी केवळ महापालिकेच्या वेबसाईटलाच भेट द्यावी.”

— मनोज लोणकर, सहआयुक्त, प्रशासन विभाग.

महापालिकेच्या या इशाऱ्यामुळे बनावट भरती रॅकेट चालवणाऱ्यांचे धाबे दणाणले असून, नागरिकांनी सजग राहणे गरजेचे आहे.

© २०२६ मॅक्स मंथन डेली न्यूज. सर्व हक्क राखीव.