नाशिक फाट्यावर ट्रॅफिक वार्डनची गुंडगिरी? वरिष्ठ शीख नागरिकाला मारहाण करण्याचा प्रयत्न आणि धमकी; बॉडी कॅमविना कारवाईवर प्रश्नचिन्ह

पिंपरी प्रतिनिधी आकाश कांबळे, २७ फेब्रुवारी २०२६ | मॅक्स मंथन डेली न्यूज:

पिंपरी : पिंपरी-चिंचवडमधील नाशिक फाटा चौकात वाहतूक पोलिसांच्या कारवाईदरम्यान एका वरिष्ठ शीख नागरिकाला अपमानास्पद वागणूक आणि धमकी देण्यात आल्याचा खळबळजनक प्रकार समोर आला आहे. “झिरो ट्रॅफिक वार्डन” म्हणून ओळख सांगणाऱ्या व्यक्तीने चक्क एका सामाजिक कार्यकर्त्याला मारण्यासाठी अंगावर धावून जाण्याचा प्रयत्न केल्याने शहरात संताप व्यक्त केला जात आहे.

दिनांक २३ फेब्रुवारी २०२६ रोजी सकाळी १० वाजेच्या सुमारास ही घटना घडली. संबंधित वरिष्ठ नागरिक, जे अल्पसंख्याक शीख समाजातील सदस्य आणि आरटीआय कार्यकर्ते आहेत, ते आपल्या वाहनाचा विमा काढण्यासाठी नाशिक फाटा जवळील गॅरेजकडे जात असताना हा प्रकार घडला.

१. गुंडगिरी की कर्तव्य? : सोहेल पठाण नावाच्या ‘झिरो ट्रॅफिक वार्डन’ने वरिष्ठ नागरिकाला ‘अरे-तुरे’ची भाषा वापरली आणि धमकावत मारण्यासाठी पुढे सरसावला.

२. अपुरी वर्दी आणि नियमभंग : घटनास्थळी उपस्थित असलेले पोलीस हवालदार विना टोपी (पूर्ण गणवेशाशिवाय) ड्युटीवर होते.

३. पारदर्शकतेचा अभाव : पोलीस नियमांनुसार कारवाईवेळी बॉडी कॅमेरा असणे बंधनकारक आहे, मात्र येथे तो नव्हता.

४. दंडाची धमकी : “डबल दंड लावू” अशी धमकी देऊन नागरिकावर दबाव टाकण्याचा प्रयत्न करण्यात आला.

या घटनेमुळे वाहतूक शाखेच्या कार्यपद्धतीवर गंभीर प्रश्न उपस्थित झाले आहेत:

• मशीन कोणाच्या ताब्यात? : ई-चलान मशीन केवळ अधिकृत पोलीस अधिकाऱ्याकडे असावी. वार्डनकडे दंड आकारणीचे अधिकार नसताना ते या कारवाईत कसे सहभागी झाले?

• वार्डनची नियुक्ती कोणामार्फत? : जर या वार्डनची नियुक्ती महापालिकेने केली असेल, तर त्यांना वाहतूक दंड वसूल करण्याचा अधिकार कोणी दिला?

• सोहेल पठाण यांच्यावर कारवाई कधी? : जनतेच्या सेवेसाठी असलेले वार्डन ‘गुंडा’सारखे वर्तन करत असतील, तर जबाबदार कोण?

या प्रकरणाची गांभीर्याने दखल घेऊन खालील मागण्या करण्यात आल्या आहेत:

• संबंधित हवालदार आणि वार्डन सोहेल पठाण यांना तात्काळ निलंबित करावे.

• नाशिक फाटा परिसरातील त्या दिवसाचे CCTV फुटेज जतन करून निष्पक्ष चौकशी व्हावी.

• वाहतूक पोलिसांना ‘बॉडी कॅमेरा’ बंधनकारक करण्याच्या नियमाची कडक अंमलबजावणी व्हावी.

वाहतूक विभागाच्या या मनमानी कारभारामुळे सर्वसामान्य नागरिकांमध्ये भीतीचे वातावरण असून, पोलीस आयुक्त यावर काय पाऊल उचलतात, याकडे सर्वांचे लक्ष लागले आहे.

© २०२६ मॅक्स मंथन डेली न्यूज. सर्व हक्क राखीव.