अभिषेक बारणे यांनी स्वीकारला स्थायी समिती सभापतीपदाचा पदभार! पारदर्शक आणि गतिमान कारभाराचा दिला शब्द; रखडलेले प्रकल्प मार्गी लावणार
पिंपरी चिंचवड प्रतिनिधी बालाजी नवले, ०४ मार्च २०२६ | मॅक्स मंथन डेली न्यूज:
पिंपरी : पिंपरी-चिंचवड महानगरपालिकेच्या तिजोरीची किल्ली मानल्या जाणाऱ्या अत्यंत महत्त्वाच्या ‘स्थायी समिती’च्या सभापतीपदी निवड झाल्यानंतर अभिषेक बारणे यांनी आज आपला अधिकृत पदभार स्वीकारला. महापालिका भवनातील स्थायी समिती सभापतींच्या दालनात हा सोहळा अत्यंत उत्साहात पार पडला. शहराचा नावलौकिक वाढवण्यासाठी पारदर्शक आणि गतिमान कारभारावर आपला भर असेल, असा विश्वास यावेळी बारणे यांनी व्यक्त केला.
याप्रसंगी चिंचवड विधानसभेचे आमदार शंकरभाऊ जगताप यांनी नवनियुक्त सभापतींचे पुष्पगुच्छ देऊन अभिनंदन केले आणि त्यांच्या पुढील वाटचालीस शुभेच्छा दिल्या.
पदभार स्वीकारल्यानंतर प्रसारमाध्यमांशी बोलताना अभिषेक बारणे यांनी आपल्या कामाची दिशा स्पष्ट केली. ते म्हणाले, “पिंपरी-चिंचवड शहराचा विस्तार वेगाने होत असल्याने नागरिकांच्या अपेक्षाही वाढल्या आहेत. अशा परिस्थितीत प्रामुख्याने पाणीपुरवठा, सांडपाणी व्यवस्थापन, रस्ते विकास आणि आरोग्य सुविधा यांसारख्या मूलभूत प्रश्नांवर स्थायी समितीच्या माध्यमातून ठोस निर्णय घेतले जातील. सामान्य नागरिकांच्या करातून जमा होणारा पैसा केवळ शहराच्या हितासाठी आणि दर्जेदार कामांसाठीच खर्च होईल, याची मी काटेकोर खबरदारी घेईन.”
शहरातील प्रलंबित प्रश्न सोडवण्यासाठी आमदार शंकरभाऊ जगताप, आमदार महेशदादा लांडगे, आमदार उमाताई खापरे आणि आमदार अमित गोरखे यांच्या मार्गदर्शनाखाली प्रशासनाशी समन्वय साधून काम करणार असल्याचे बारणे यांनी स्पष्ट केले. रखडलेले प्रकल्प वेळेत पूर्ण करण्याला आपले सर्वोच्च प्राधान्य असेल, असेही त्यांनी आवर्जून सांगितले.
एक तरुण आणि अभ्यासू नेतृत्व म्हणून अभिषेक बारणे यांच्या निवडीकडे पाहिले जात आहे. पदभार स्वीकारताच त्यांनी वेळ न घालवता तातडीने प्रशासकीय कामाचा आणि शहरातील सुरू असलेल्या विविध विकासकामांचा आढावा घेण्यास सुरुवात केली आहे. आगामी काळात स्थायी समितीच्या निर्णयांकडे संपूर्ण शहरवासीयांचे लक्ष लागून राहणार आहे.
© २०२६ मॅक्स मंथन डेली न्यूज. सर्व हक्क राखीव.
