पुण्यात गॅसचा ‘वनवास’! घरगुती सिलिंडरसाठी ४ दिवसांचे वेटिंग, तर काळ्या बाजारात भाव २२०० रुपयांवर; आखाती युद्धाचा पुणेकरांना फटका

पुणे/पिंपरी प्रतिनिधी आकाश कांबळे, १२ मार्च २०२६ | मॅक्स मंथन डेली न्यूज:

पुणे : आखाती देशांमधील युद्धजन्य परिस्थितीचा परिणाम आता थेट पुणेकरांच्या स्वयंपाकघरात जाणवू लागला आहे. पुण्यात गेल्या ४८ तासांत घरगुती एलपीजी (LPG) सिलिंडरच्या बुकिंगमध्ये प्रचंड वाढ झाली असून, वितरणाअभावी नागरिकांना ३ ते ४ दिवस प्रतीक्षा करावी लागत आहे. अनेक ठिकाणी सिलिंडरचा काळा बाजार सुरू झाला असून, ८०० ते ९०० रुपयांचे सिलिंडर चक्क १८०० ते २२०० रुपयांना विकले जात असल्याची धक्कादायक माहिती समोर आली आहे.

• वेटिंग पिरीयड वाढला: आधी बुकिंग केल्यावर काही तासांत मिळणारे सिलिंडर आता ४ दिवस उलटूनही मिळेनासे झाले आहेत. विशेषतः हिंजवडी आणि विमाननगर परिसरात ही समस्या गंभीर आहे.

• व्यावसायिक पुरवठा बंद: हॉटेल आणि इतर व्यावसायिक कामांसाठीचा गॅस पुरवठा पूर्णपणे थांबवण्यात आला असून, केवळ घरगुती ग्राहकांना प्राधान्य दिले जात आहे.

• सर्व्हर डाऊन: एकाच वेळी हजारो नागरिक बुकिंग करत असल्याने गॅस कंपन्यांचे सर्व्हर वारंवार डाऊन होत आहेत, त्यामुळे बुकिंग प्रक्रियेत तांत्रिक अडथळे येत आहेत.

पुण्यातील विमाननगर परिसरातील पूजा यत्नूर या महिलेने सांगितले की, नियमित बुकिंग शक्य नसल्याने त्यांना एका सिलिंडरसाठी चक्क १८०० रुपये मोजावे लागले. तर सोशल मीडियावर एका युजरने संताप व्यक्त करत म्हटले आहे की, “या महागाईत मुलांचे संगोपन कसे करायचे? एका सिलिंडरसाठी २२०० रुपये द्यावे लागले आहेत.”

ऑल इंडिया एलपीजी डिस्ट्रिब्युटर्स फेडरेशनचे सचिव प्रवीण खांडळकर यांनी सांगितले की, “कंपन्यांनी वितरकांना ठरवून दिलेला ‘डेली कोटा’ (Daily Quota) कडक केला आहे. साठेबाजी आणि काळा बाजार रोखण्यासाठी हे पाऊल उचलले आहे. नागरिक घाबरून गरजेपेक्षा जास्त बुकिंग करत आहेत, ज्यामुळे यंत्रणेवर ताण येत आहे.”

ज्यांना गॅस मिळत नाही, ते नागरिक आता इंडक्शन स्टोव्ह किंवा मायक्रोवेव्हचा आधार घेत आहेत. मात्र, पुण्यात वारंवार होणाऱ्या वीज कपातीमुळे (Power Cuts) इंडक्शनवर स्वयंपाक करणेही कठीण झाले आहे. अनेक ई-कॉमर्स ॲप्सवर इंडक्शन शेगड्यांचा साठाही संपत चालला आहे.

महत्वाची टिप: अनेक वितरकांचे म्हणणे आहे की, त्यांच्याकडे पुरेसा साठा आहे, केवळ तांत्रिक आणि वाहतुकीच्या कारणांमुळे उशीर होत आहे. त्यामुळे नागरिकांनी अफवांवर विश्वास ठेवून ‘पॅनिक बुकिंग’ करू नये.

© २०२६ मॅक्स मंथन डेली न्यूज. सर्व हक्क राखीव।