पिंपरी-चिंचवड पोलिसांची मोठी कारवाई! सोमाटणे फाटा येथे शस्त्र तस्करांच्या टोळीला बेड्या; ४ पिस्तुलं आणि ७ जिवंत काडतूसं जप्त

पिंपरी चिंचवड प्रतिनिधी: बालाजी नवले, १२ मार्च २०२६ | मॅक्स मंथन डेली न्यूज:

पिंपरी : पिंपरी-चिंचवड पोलीस आयुक्तालय हद्दीत बेकायदेशीर अग्निशस्त्र बाळगणाऱ्या आणि त्यांची तस्करी करणाऱ्या गुन्हेगारांविरुद्ध पोलिसांनी कडक मोहीम उघडली आहे. मालमत्ता गुन्हे विरोधी पथकाने १० मार्च २०२६ रोजी सोमाटणे फाटा येथे सापळा रचून एका खतरनाक टोळीला अटक केली. या कारवाईत पोलिसांनी ४ गावठी बनावटीची पिस्तुलं आणि ७ जिवंत काडतुसांसह सुमारे १० लाख ९२ हजार रुपयांचा मुद्देमाल जप्त केला आहे.

मालमत्ता गुन्हे विरोधी पथकाचे वरिष्ठ पोलीस निरीक्षक संजय चव्हाण यांना गुप्त बातमीदाराकडून माहिती मिळाली होती की, पोलीस रेकॉर्डवरील गुन्हेगार सरदार सय्यद हा त्याच्या साथीदारांसह सोमाटणे फाटा येथे पिस्तुल विक्रीसाठी येणार आहे. या माहितीच्या आधारे पथकाने निर्जन स्थळी सापळा रचला आणि एका मारुती सुझुकी फ्रॉक्स कारमधून आलेल्या तीन आरोपींना शिताफीने ताब्यात घेतले.

१. सरदार अकबर सय्यद (वय २७, रा. तळेगाव दाभाडे) – याच्यावर यापूर्वी चाकण पोलीस ठाण्यात ‘मोक्का’ (MCOCA) अंतर्गत गंभीर गुन्हे दाखल आहेत.

२. विशाल नाना कुडेकर (वय ३५, रा. खेड, जि. पुणे).

३. प्रशांत बबुशा सोनवणे (वय २८, रा. टिळक नगर, चेंबूर, मुंबई).

पोलिसांनी आरोपींकडून खालील मुद्देमाल हस्तगत केला आहे:

• शस्त्रे: ०४ देशी बनावटीची पिस्तुलं आणि ०७ जिवंत काडतूसं.

• वाहन: गुन्ह्यात वापरलेली मारुती सुझुकी फ्रॉक्स कार.

• इतर: ०३ महागडे मोबाईल फोन.

  एकूण किंमत: १०,९२,०००/- रुपये.

पोलिसांनी केलेल्या प्राथमिक तपासात धक्कादायक माहिती समोर आली आहे. हे आरोपी ही शस्त्रे मध्य प्रदेशातील उमरी (जि. खरगोन) येथील गुरुसिंग नावाच्या व्यक्तीकडून आणत असत. या रॅकेटमध्ये आणखी किती जणांचा समावेश आहे, याचा तपास आता पोलीस मध्य प्रदेशात जाऊन करणार आहेत.

पोलीस आयुक्त विनय कुमार चौबे, सह-पोलीस आयुक्त शशिकांत महावरकर, अपर पोलीस आयुक्त सारंग आव्हाड, पोलीस उप-आयुक्त (गुन्हे) डॉ. शिवाजी पवार, आणि सहाय्यक पोलीस आयुक्त डॉ. विशाल हिरे यांच्या मार्गदर्शनाखाली:

वरिष्ठ पोलीस निरीक्षक संजय चव्हाण, सहाय्यक निरीक्षक गोरक्षनाथ बालवडकर, महेश खांडे, पोलीस अंमलदार गणेश सावंत, विनोद वीर, हर्षद कदम, गणेश कोकणे आणि इतर सहकाऱ्यांनी ही यशस्वी कारवाई केली.

© २०२६ मॅक्स मंथन डेली न्यूज. सर्व हक्क राखीव।