अकोला पोलिसांचा ‘ऑटो’ दणका! नियमांचे उल्लंघन करणारे ६७ रिक्षा जप्त; पोलीस अधीक्षकांच्या आदेशाने विशेष मोहीम

अकोला /मुर्तिजापुर प्रतिनिधी विलास सावळे, १४ मार्च २०२६ | मॅक्स मंथन डेली न्यूज:

अकोला : अकोला शहरातील विस्कळीत वाहतुकीला शिस्त लावण्यासाठी आणि अपघातांना निमंत्रण देणाऱ्या नियमांचे उल्लंघन करणाऱ्या रिक्षा चालकांविरुद्ध शहर वाहतूक नियंत्रण शाखेने धडक कारवाई सुरू केली आहे. पोलीस अधीक्षक अर्चित चांडक यांच्या आदेशानुसार, शुक्रवारी शहरात राबविलेल्या विशेष मोहिमेत नियमांचे उल्लंघन करणारे तब्बल ६७ ऑटो रिक्षा जप्त करण्यात आले आहेत.

शहर वाहतूक नियंत्रण शाखेच्या अधिकारी व अंमलदारांनी शुक्रवारी (१३ मार्च) सकाळपासूनच शहरातील मुख्य चौकांसह शासकीय बस स्थानक आणि रेल्वे स्टेशन परिसरात ही मोहीम राबवली. यामध्ये लायसन्स नसणे, गणवेशाचा अभाव, क्षमतेपेक्षा जास्त प्रवासी वाहतूक आणि रस्त्यावर अस्ताव्यस्त रिक्षा उभ्या करणाऱ्या चालकांवर मोटर वाहन कायद्यांतर्गत कारवाई करण्यात आली.

कारवाईचा तपशील:

• जप्त रिक्षा: ६७ ऑटो रिक्षा कार्यालयीन आवारात जमा करण्यात आले.

• आकारलेला दंड: एकूण २१ हजार ३०० रुपये दंड आकारण्यात आला.

• वसूल दंड: ४ हजार ६०० रुपये दंड जागेवर वसूल करण्यात आला.

जप्त केलेल्या रिक्षा चालकांना वाहतूक शाखेच्या कार्यालयात आणून त्यांच्यावर कायदेशीर कारवाई करण्यात आली. मात्र, केवळ दंड आकारून न थांबता, पोलीस प्रशासनाने या चालकांचे समुपदेशनही केले. त्यांना वाहतूक नियमांचे महत्त्व पटवून देऊन भविष्यात नियमांचे पालन करण्याची समज देण्यात आली.

शहरातील वाहतूक सुकर व्हावी यासाठी वाहतूक शाखेने चालकांसाठी खालील सूचना जारी केल्या आहेत:

१. रिक्षा चालवताना नेहमी गणवेश परिधान करावा.

२. रिक्षा उभी करण्यासाठी केवळ ऑटो स्टँडचा वापर करावा, रस्त्यावर वाहने लावू नयेत.

३. क्षमतेपेक्षा जास्त शाळकरी मुले किंवा प्रवाशांची वाहतूक करू नये.

४. वाहनाचे सर्व अधिकृत कागदपत्रे आणि परवाना सोबत बाळगावा.

५. आपल्या वाहनावर कोणताही पेंडिंग दंड असल्यास तो त्वरित वाहतूक शाखा किंवा ऑनलाइन पोर्टलवर भरावा.

नियम न पाळणाऱ्या चालकांवर येणाऱ्या काळात अधिक कठोर कारवाई केली जाईल, असा इशाराही प्रशासनाकडून देण्यात आला आहे.

© २०२६ मॅक्स मंथन डेली न्यूज. सर्व हक्क राखीव।