वाहनचालकांनो लक्ष द्या! बालेवाडीत मेट्रोच्या कामासाठी मुंबई-बेंगलोर महामार्ग राहणार बंद; जाणून घ्या वाहतुकीचे नवीन बदल

पिंपरी चिंचवड प्रतिनिधी: बालाजी नवले, १४ मार्च २०२६ | मॅक्स मंथन डेली न्यूज:

पिंपरी-चिंचवड : मुंबई-बेंगलोर महामार्गावर बालेवाडी मेट्रो स्टेशन क्र. १० येथे फुट ओव्हर ब्रिजच्या (FOB) उभारणीचे काम हाती घेण्यात आले आहे. या कामाच्या सुरक्षिततेसाठी महामार्गावरील मुख्य रस्ता वाहतुकीसाठी बंद ठेवण्यात येणार असून, वाहतूक पर्यायी मार्गाने वळवण्यात आली आहे. पिंपरी-चिंचवड वाहतूक शाखेचे पोलीस उप-आयुक्त विवेक पाटील यांनी यासंदर्भातील अधिसूचना जारी केली आहे.

बालेवाडी मेट्रो स्टेशनच्या कामासाठी मुंबई लेन आणि सातारा लेन अशा दोन्ही बाजूंचा मुख्य रस्ता बंद करण्यात आला आहे.

• मनाई असलेला मार्ग: मुंबईकडून साताऱ्याकडे जाणारा आणि साताऱ्याकडून मुंबईकडे जाणारा मुख्य महामार्ग सर्व प्रकारच्या वाहनांसाठी बंद राहील.

• पर्यायी मार्ग: मुख्य महामार्गावरील सर्व वाहतूक महामार्गाला लागून असलेल्या ‘सर्व्हिस रोड’ने (सेवा रस्ता) वळवण्यात आली आहे. वाहनचालक सेवा रस्त्याचा वापर करून आपल्या इच्छित स्थळी जाऊ शकतात.

सदर वाहतूक बदल मर्यादित कालावधीसाठी लागू असतील:

• सुरुवात: दिनांक १४ मार्च २०२६ रोजी रात्री २३:०० वाजता (११:०० PM).

• समाप्ती: दिनांक १५ मार्च २०२६ रोजी सकाळी ०५:०० वाजेपर्यंत (५:०० AM).

हे काम मे. टाटा प्रोजेक्ट्स लिमिटेडमार्फत करण्यात येत आहे. कामाच्या ठिकाणी वाहनचालकांना स्पष्ट दिसेल असे माहिती फलक लावण्याच्या आणि बॅरिगेटिंग करण्याच्या सूचना देण्यात आल्या आहेत. तसेच, वाहतुकीचे नियोजन करण्यासाठी टाटा प्रोजेक्ट्सकडून ट्रॅफिक वॉर्डनची नेमणूक करण्यात आली आहे.

बावधन वाहतूक विभागाच्या प्रभारी अधिकाऱ्यांनी कंत्राटदाराकडून सर्व सुरक्षा उपाययोजना करून घेण्याचे निर्देश देण्यात आले आहेत. तरी वाहनचालकांनी वाहतूक पोलिसांना सहकार्य करावे आणि नियोजित वेळेत प्रवास करताना सेवा रस्त्याचा वापर करावा, असे आवाहन पोलीस उप-आयुक्त विवेक पाटील यांनी केले आहे.

© २०२६ मॅक्स मंथन डेली न्यूज. सर्व हक्क राखीव।