पुनावळेतील वाहतूक कोंडी आणि धुळीच्या समस्येवर महापौरांचा ‘ऑन द स्पॉट’ ॲक्शन मोड! महामार्ग प्राधिकरण आणि पालिकेची लवकरच संयुक्त बैठक

पिंपरी चिंचवड प्रतिनिधी: बालाजी नवले, १६ मार्च २०२६ | मॅक्स मंथन डेली न्यूज:

पिंपरी-चिंचवड : पुणे-बेंगळुरू राष्ट्रीय महामार्गावरील पुनावळे येथील छत्रपती शिवाजी महाराज चौकात सातत्याने होणारी वाहतूक कोंडी आणि नागरिकांच्या आरोग्याशी संबंधित असलेल्या धुळीच्या समस्येची पिंपरी-चिंचवडचे महापौर रवी लांडगे यांनी रविवारी (१५ मार्च) प्रत्यक्ष पाहणी केली. नागरिकांना होणारा त्रास लक्षात घेऊन महापौरांनी यावेळी उपस्थित अधिकाऱ्यांना तातडीने उपाययोजना करण्याचे निर्देश दिले आहेत.

पुनावळे परिसरात गेल्या काही वर्षांत झालेल्या वेगवान नागरीकरणामुळे या चौकातील वाहनसंख्या मोठ्या प्रमाणात वाढली आहे. महापौरांनी केलेल्या पाहणीत प्रामुख्याने खालील बाबी समोर आल्या:

• पीक अवरमधील कोंडी: सकाळी आणि संध्याकाळी महामार्गाला जोडणाऱ्या या चौकात वाहनांच्या लांबच लांब रांगा लागतात.

• धुळीचे साम्राज्य: सुरू असलेली बांधकामे आणि वाहनांच्या वर्दळीमुळे उडणाऱ्या धुळीमुळे स्थानिक रहिवासी आणि वाहनचालक त्रस्त आहेत.

नागरिकांची गैरसोय टाळण्यासाठी महापौर लांडगे यांनी प्रशासनाला खालील सूचना केल्या आहेत:

१. धुळीवर नियंत्रण: रस्ते नियमित स्वच्छ करून त्या ठिकाणी पाण्याची फवारणी करावी.

२. वाहतूक नियोजन: सिग्नल व्यवस्थेचे योग्य टायमिंग सेट करणे आणि पर्यायी मार्गांचा वापर करण्याबाबत नियोजन करावे.

३. संयुक्त बैठक: महापालिका आणि राष्ट्रीय महामार्ग प्राधिकरण (NHAI) यांच्यात लवकरच बैठक घेऊन या समस्येवर कायमस्वरूपी तोडगा काढला जाईल.

या पाहणी दौऱ्यावेळी नगरसदस्या रेश्मा भुजबळ, नगरसदस्य कुणाल वाव्हळकर, सह शहर अभियंता सुनील भागवानी, कार्यकारी अभियंता सोहन निकम, योगेश आल्हाट, श्रीराम गायकवाड तसेच नामदेवराव जाधव, चेतन भुजबळ, गजानन सूर्यवंशी यांसह इतर पदाधिकारी आणि अधिकारी उपस्थित होते.

“पुनावळेकरांच्या समस्या सोडवण्यासाठी महापालिका प्रशासन कटिबद्ध आहे. तातडीच्या उपाययोजनांसोबतच महामार्ग प्राधिकरणाशी समन्वय साधून दीर्घकालीन नियोजन केले जाईल,” असे आश्वासन महापौर रवी लांडगे यांनी यावेळी दिले.

© २०२६ मॅक्स मंथन डेली न्यूज. सर्व हक्क राखीव।