ॲक्शन मोडमध्ये आयुक्त! डॉ. विजय सूर्यवंशी यांनी झाडली पालिकेच्या विभागांची झाडाझडती; कार्यालयीन शिस्त आणि स्वच्छतेबाबत दिले कडक निर्देश

पिंपरी प्रतिनिधी आकाश कांबळे, १८ मार्च २०२६ | मॅक्स मंथन विशेष:

पिंपरी : पिंपरी-चिंचवड महानगरपालिकेचे नवनियुक्त आयुक्त डॉ. विजय सूर्यवंशी यांनी आज पदभार स्वीकारल्यानंतर लगेचच ‘ॲक्शन मोड’मध्ये येत मुख्य प्रशासकीय भवनातील विविध विभागांची सखोल पाहणी केली. केवळ एसी केबिनमध्ये न बसता थेट विभागांच्या टेबलापर्यंत पोहोचत आयुक्तांनी कामकाजाचा आढावा घेतला, ज्यामुळे पालिकेच्या अधिकारी आणि कर्मचाऱ्यांची चांगलीच धावपळ उडाली.

प्रशासकीय कामकाज अधिक पारदर्शक, गतिमान आणि नागरिकाभिमुख करण्यासाठी आयुक्तांनी यावेळी अनेक महत्त्वाच्या सूचना केल्या.

• फाईल्सचे डोंगर हटवा: अनेक विभागांमध्ये जुन्या फाईल्स आणि अनावश्यक कागदपत्रांचे ढिगारे पाहून आयुक्तांनी नाराजी व्यक्त केली. हे कागदपत्रांचे गट्ठे तातडीने हटवून कार्यालयीन जागा सुटसुटीत आणि स्वच्छ ठेवण्याचे आदेश त्यांनी दिले.

• डिजिटल कामकाजावर भर: कागदविरहित (Paperless) कामकाजासाठी डिजिटल पद्धतींचा जास्तीत जास्त वापर करण्याच्या सूचना त्यांनी दिल्या.

• वेळेची शिस्त: सर्व अधिकारी आणि कर्मचाऱ्यांनी कार्यालयात वेळेवर उपस्थित राहणे बंधनकारक असून, शिस्तीबाबत कोणतीही तडजोड केली जाणार नाही, असे त्यांनी स्पष्ट केले.

• नागरिकांशी संवाद: विभागात येणाऱ्या नागरिकांना सुलभ आणि विश्वासार्ह सेवा मिळावी, तसेच त्यांच्या तक्रारींचे निवारण तातडीने व्हावे, यावर आयुक्तांनी भर दिला.

विशेष म्हणजे, ही पाहणी केवळ एकदा करून आयुक्त थांबणार नाहीत. “आज दिलेल्या सूचनांची अंमलबजावणी झाली की नाही, याची खातरजमा करण्यासाठी पुढील १५ दिवसांनी पुन्हा एकदा सर्व विभागांची पाहणी केली जाईल,” असा इशारा डॉ. सूर्यवंशी यांनी दिला आहे. मुख्य इमारतीनंतर आता सर्व क्षेत्रीय कार्यालयांचीही (Ward Offices) लवकरच पाहणी केली जाणार आहे.

या पाहणी दौऱ्यात उपसंचालक किशोर गोखले, सहआयुक्त मनोज लोणकर, मुख्य अभियंता प्रमोद ओंभासे, सह शहर अभियंता सुनील भागवानी, बापू गायकवाड, अनिल भालसाखळे, उपायुक्त राजेश आगळे, सचिन पवार, चेतना केरुरे, विशेष अधिकारी किरण गायकवाड आणि जनसंपर्क अधिकारी प्रफुल्ल पुराणिक यांच्यासह विविध विभागांचे प्रमुख उपस्थित होते.

© २०२६ मॅक्स मंथन डेली न्यूज. सर्व हक्क राखीव।