बिल्डरला ‘महारेरा’चा दणका! वाकडमधील ‘आसवानी पॅराडाइज’मधील त्रुटी ६० दिवसांत पूर्ण करण्याचे आदेश; रहिवाशांच्या लढ्याला मोठे यश

पिंपरी चिंचवड प्रतिनिधी बालाजी नवले, २९ मार्च २०२६ | मॅक्स मंथन रिअल इस्टेट विशेष:

वाकड : वाकड परिसरातील ‘आसवानी पॅराडाइज’ (आसवानी गॅलेक्सी) या गृहनिर्माण प्रकल्पातील अपूर्ण सुविधा, निकृष्ट बांधकाम आणि सुरक्षा व्यवस्थेतील गंभीर त्रुटींची दखल घेत महाराष्ट्र रिअल इस्टेट नियामक प्राधिकरणाने (महारेरा) विकासकाला जोरदार चपराक लगावली आहे. प्रकल्पातील सर्व उणिवा पुढील ६० दिवसांच्या आत दुरुस्त करण्याचे स्पष्ट निर्देश महारेराने प्रमोटर अनिल आणि श्रीचंद आसवानी यांना दिले आहेत.

प्रकल्पातील रहिवासी ओमप्रकाश जांगिर आणि मनीषा जांगिर यांनी एप्रिल २०२५ मध्ये विकासकाविरुद्ध तक्रार दाखल केली होती. सुरुवातीला वैयक्तिक स्वरूपातील या तक्रारीला नंतर सोसायटीच्या ठरावामुळे ‘गटतक्रारी’चे स्वरूप प्राप्त झाले. रहिवाशांनी बिल्डरकडे वारंवार पाठपुरावा करूनही आणि ‘रेरा’ अंतर्गत दोन वर्षांची मुदतवाढ मिळूनही सुविधा पूर्ण झाल्या नव्हत्या.

• मेकॅनिकल पार्किंग: प्रकल्पातील पार्किंग यंत्रणा अद्याप अपूर्ण आणि अकार्यान्वित आहे.

• बांधकामातील दोष: भिंतींना सीपेज (गळती) लागणे आणि बांधकामाचा दर्जा खालावलेला असणे.

• अपूर्ण अग्निशमन यंत्रणा: फायर सेफ्टी व्यवस्था कार्यान्वित नसल्याने रहिवाशांचा जीव धोक्यात आहे.

• आपत्कालीन अडथळा: अनधिकृत पार्किंग वाटपामुळे रुग्णवाहिका किंवा अग्निशमन दलाच्या गाड्यांना आत येण्यास मार्ग उरलेला नाही.

• प्रमाणपत्रांचा अभाव: पूर्णत्व प्रमाणपत्र (CC) आणि भोगवटा प्रमाणपत्र (OC) मिळविण्यात बिल्डर अपयशी ठरला आहे.

प्राधिकरणाने तक्रारदारांचे म्हणणे ग्राह्य धरत विकासकाला ६० दिवसांची अंतिम मुदत दिली आहे. या काळात:

१. मेकॅनिकल पार्किंग यंत्रणा पूर्ण करून कार्यान्वित करणे.

२. बांधकामातील सर्व दोष (Defects) दूर करणे.

३. फायर सेफ्टी यंत्रणा पूर्ण क्षमतेने सुरू करणे.

४. आपत्कालीन वाहनांसाठी रस्ता मोकळा करणे बंधनकारक राहील.

आदेशाचे पालन न केल्यास ‘रेरा’ कायद्यांतर्गत विकासकावर कठोर कायदेशीर कारवाई करण्यात येईल, असा इशाराही देण्यात आला आहे.

“बिल्डरने वारंवार दिलेल्या मुदतीनंतरही मूलभूत सुविधा पूर्ण केल्या नाहीत. सुरक्षिततेच्या दृष्टीने हा प्रकल्प अत्यंत धोकादायक स्थितीत होता. ‘महारेरा’च्या या आदेशामुळे रहिवाशांच्या तक्रारी योग्य असल्याचे सिद्ध झाले असून, आम्हाला न्याय मिळेल अशी आशा आहे.”

— ओमप्रकाश जांगिर, तक्रारदार व रहिवासी, वाकड.

© २०२६ मॅक्स मंथन डेली न्यूज. सर्व हक्क राखीव।