अकोल्यात खाकी डागाळली! सिव्हिल लाईन पोलिसांचा गुन्हेगारांवर धाक नाही, पण महिलांशी गैरवर्तन करण्यात आघाडीवर?
अकोला/मुर्तिजापूर प्रतिनिधी विलास सावळे, दिनांक: ३ एप्रिल २०२६, मॅक्स मंथन डेली न्यूज:
अकोला: अकोला शहरातील कायदा आणि सुव्यवस्थेचे सध्या तीन-तेरा वाजले असून, सिव्हिल लाईन पोलीस ठाणे वादाच्या भोवऱ्यात सापडले आहे. ज्यांच्या खांद्यावर नागरिकांच्या संरक्षणाची जबाबदारी आहे, तेच पोलीस कर्मचारी आता महिलांशी गैरवर्तन आणि विनयभंग करत असल्याच्या धक्कादायक तक्रारी समोर येत आहेत. या प्रकारामुळे अकोल्यात ‘रक्षकच भक्षक’ बनल्याची भावना नागरिकांमध्ये निर्माण झाली आहे.
३१ मार्च २०२६ रोजी अकोल्यात एका शिक्षिकेची भररस्त्यात २.५ लाख रुपये किमतीची सोन्याची साखळी चोरट्यांनी लांबवली. ही घटना घडली तेव्हा शहर गजबजलेले असतानाही चोरटे पसार झाले. विशेष म्हणजे, या घटनेला तीन दिवस उलटूनही सिव्हिल लाईन पोलिसांना आरोपींचा साधा सुगावाही लागलेला नाही. पोलिसांच्या या ‘आळशी’ कार्यपद्धतीमुळे गुन्हेगारांचे मनोबल उंचावले आहे.
केवळ गुन्हेगारी रोखण्यात अपयश आलेले नाही, तर सिव्हिल लाईन पोलीस ठाण्यातील काही कर्मचाऱ्यांचे महिलांशी असलेले वर्तन अत्यंत खालच्या पातळीचे असल्याचे बोलले जात आहे. महिलांच्या सन्मानाची ऐशीतैसे करत काही पोलीस चक्क विनयभंगासारखे गंभीर प्रकार करत असल्याच्या तक्रारींमुळे अकोला पोलीस दलाची प्रतिमा मलीन झाली आहे. या मुजोर कर्मचाऱ्यांवर ठाणेदारांचा कोणताही वचक उरलेला नाही, ही जिल्ह्यासाठी शरमेची बाब ठरत आहे.
परिसरात वरली-मटका आणि जुगार अड्ड्यांचा महापूर आला आहे. या अवैध धंद्यांतून मिळणाऱ्या आर्थिक फायद्यामुळेच पोलीस अधिकारी आणि कर्मचाऱ्यांचे गुन्हेगारांशी साटेलोटे असल्याची चर्चा शहरात रंगली आहे. मटका अड्ड्यांवर नियंत्रण मिळवण्यात ठाणेदारांना सपशेल अपयश आले असून, कर्मचारी कर्तव्यापेक्षा अवैध धंद्यांचे रक्षण करण्यातच धन्यता मानत असल्याचे चित्र दिसत आहे.
एकीकडे भरदिवसा होणारी लूटमार आणि दुसरीकडे खुद्द पोलिसांकडूनच महिलांचा होणारा विनयभंग, अशा दुहेरी संकटात अकोलेकर सापडले आहेत. शिस्तीचा अभाव असलेल्या सिव्हिल लाईन पोलीस ठाण्याच्या या ‘बेफाम’ कारभारावर जिल्हा पोलीस अधीक्षक आता काय कठोर कारवाई करतात, याकडे संपूर्ण शहराचे लक्ष लागले आहे.
© २०२६ मॅक्स मंथन डेली न्यूज. सर्व हक्क राखीव.
