“तहसीलदार हटवा, अन्यथा आत्मदहन करणार!”; भद्रावतीत भाकपा नेते राजू गैनवार यांचा प्रशासनाला इशारा
भद्रावती, प्रतिनिधी विलास सावळे, दिनांक: ३ एप्रिल २०२६, मॅक्स मंथन डेली न्यूज:
भद्रावती: भद्रावती तहसील कार्यालयातील गलथान कारभार आणि तहसीलदारांच्या अकार्यक्षमतेमुळे संतप्त झालेले भारतीय कम्युनिस्ट पक्षाचे (भाकपा) जिल्हा सहसचिव तथा माजी नगरसेवक कॉमरेड राजू महादेव गैनवार यांनी प्रशासनाविरुद्ध आक्रमक पवित्रा घेतला आहे. “येथील तहसीलदार राजेश भांडारकर यांना तातडीने हटवा, अन्यथा आत्मदहन करू,” असा थेट इशारा त्यांनी जिल्हाधिकाऱ्यांना पाठविलेल्या निवेदनातून दिला आहे. या इशाऱ्यामुळे प्रशासकीय वर्तुळात मोठी खळबळ उडाली आहे.
राजू गैनवार यांनी आपल्या निवेदनात म्हटले आहे की, तहसीलदार राजेश भांडारकर यांच्या वेळकाढू धोरणामुळे आणि नागरिकांच्या प्रश्नांकडे होणाऱ्या दुर्लक्षामुळे तहसील कार्यालयातील सामान्य कामकाज पूर्णपणे ठप्प झाले आहे. सर्वसामान्यांना साध्या कामांसाठीही अनेक महिने कार्यालयाचे उंबरठे झिजवावे लागत आहेत. अनेक प्रलंबित प्रकरणे मार्गी लागत नसल्याने नागरिकांमध्ये प्रशासनाविरुद्ध तीव्र संताप आहे.
तहसील प्रशासनाच्या निष्काळजीपणामुळे यापूर्वी परमेश मेश्राम या शेतकऱ्याने टोकाचे पाऊल उचलून आत्महत्या केल्याचा गंभीर आरोपही गैनवार यांनी केला आहे. इतकी मोठी घटना घडूनही तहसीलदारांनी कोणताही धडा घेतलेला नाही, उलट परिस्थिती अधिकच बिकट होत चालली असल्याचा दावा निवेदनात करण्यात आला आहे.
केवळ नागरिकच नव्हे, तर तहसील कार्यालयातील अधिकारी आणि कर्मचारी वर्गही या कार्यपद्धतीमुळे त्रस्त असून ते मानसिक तणावाखाली काम करत असल्याचे चित्र आहे. वरिष्ठ अधिकाऱ्यांच्या अकार्यक्षमतेमुळे संपूर्ण यंत्रणा निष्क्रिय झाल्याची भावना व्यक्त होत आहे.
प्रशासनाने या तक्रारीची दखल घेऊन १० दिवसांच्या आत संबंधित तहसीलदारांवर कारवाई करावी, अशी मागणी गैनवार यांनी केली आहे. अन्यथा, आत्मदहन करण्याशिवाय आपल्याकडे कोणताही पर्याय उरणार नाही, असा इशारा त्यांनी दिला आहे. या निवेदनाच्या प्रती मुख्यमंत्री, महसूल मंत्री आणि पालकमंत्री यांनाही पाठविण्यात आल्या आहेत.
आता या १० दिवसांच्या कालावधीत जिल्हा प्रशासन काय पावले उचलते आणि भद्रावतीचा हा पेटलेला प्रश्न कसा शांत होतो, याकडे संपूर्ण तालुक्याचे लक्ष लागले आहे.
© २०२६ मॅक्स मंथन डेली न्यूज. सर्व हक्क राखीव.
