भीमसृष्टी परिसरात घुमला समतेचा जागर! कव्वाल फैजान ताज यांचा ‘क्रांतिसूर्याला सलाम’ आणि ऐतिहासिक नाटकाने जिंकली मने

महात्मा फुले यांचे विचार आजही मार्गदर्शक; तज्ज्ञांच्या परिसंवादातून समताधिष्ठित समाजव्यवस्थेचा ऊहापोह

पिंपरी चिंचवड प्रतिनिधी बालाजी नवले, १२ एप्रिल २०२६ मॅक्स मंथन डेली न्यूज:

पिंपरी: “क्रांतिसूर्य महात्मा जोतीराव फुले यांनी स्त्रीशिक्षणाचा पाया रचला आणि जातिभेदाविरुद्ध लढा देऊन समताधिष्ठित समाजव्यवस्थेचा विचार मांडला. त्यांचे हे विचार आजही समाजाच्या सर्वांगीण विकासासाठी दीपस्तंभासारखे मार्गदर्शक आहेत,” असे मत विविध क्षेत्रांतील तज्ज्ञांनी व्यक्त केले.

पिंपरी चिंचवड महानगरपालिकेच्या वतीने आयोजित ‘सामाजिक समता सप्ताह व विचार प्रबोधन पर्व २०२६’ अंतर्गत ‘महात्मा फुले यांना अभिप्रेत समाजव्यवस्था’ या विषयावर विशेष परिसंवादाचे आयोजन करण्यात आले होते. याप्रसंगी ज्येष्ठ पत्रकार विजय चोरमारे, ॲड. गोरक्ष लोखंडे, ॲड. मनीषा महाजन, संविधान अभ्यासक नुरखा पठाण आणि सर्वोच्च न्यायालयातील ॲड. दिशा वाडेकर यांनी आपले विचार मांडले.

• विजय चोरमारे (ज्येष्ठ पत्रकार): महात्मा फुले यांनी प्रज्वलित केलेला समतेचा दीप आजही मार्गदर्शक आहे. माध्यमांनी हा विचार अधिक संवेदनशीलतेने समाजापर्यंत पोहोचवणे गरजेचे आहे.

• ॲड. गोरक्ष लोखंडे (सदस्य, अ.जा.ज. आयोग): संघटित प्रयत्न आणि जागृतीतूनच सामाजिक परिवर्तन शक्य आहे. महिलांना संधी उपलब्ध करून दिल्यास समाज अधिक सक्षम होईल.

• ॲड. मनीषा महाजन: अंधश्रद्धा आणि जुनाट परंपरांविरुद्ध महात्मा फुले यांनी मांडलेल्या वैज्ञानिक दृष्टिकोनाची आज देशाला नितांत गरज आहे.

• नुरखा पठाण (संविधान अभ्यासक): समता, बंधुता आणि न्याय या तत्त्वांवर आधारित समाज निर्माण करण्यासाठी प्रत्येकाचा सक्रिय सहभाग आवश्यक आहे.

• ॲड. दिशा वाडेकर (दिल्ली): वंचितांच्या हक्कांकडे आणि महिलांच्या प्रश्नांकडे विशेष लक्ष देणे हीच फुले यांना खरी श्रद्धांजली ठरेल.

यावेळी शहर सुधारणा समिती सभापती संजय काटे, शिक्षण समिती सभापती रविना आंगोळकर, नगरसदस्या अनुराधा गोरखे आणि इतर मान्यवर उपस्थित होते. प्रास्ताविक उपायुक्त अण्णा बोदडे यांनी केले.

प्रबोधन पर्वाच्या पहिल्या दिवशी सायंकाळच्या सत्रात सांस्कृतिक आणि वैचारिक कार्यक्रमांची मोठी मेजवानी रंगली.

१. क्रांतिसूर्याला सलाम: कव्वाल फैजान ताज यांनी आपल्या बहारदार सादरीकरणातून महात्मा फुले आणि भारतरत्न डॉ. बाबासाहेब आंबेडकर यांच्या कार्याचा गौरव केला. त्यांच्या गीतांनी उपस्थितांची मने जिंकली.

२. जोतिबांची सावली…सावित्री माऊली: अमरावतीच्या तेजांकुर बहुउद्देशीय संस्थेने सादर केलेल्या या दोन अंकी ऐतिहासिक नाटकाने प्रेक्षकांना भावूक केले. अपूर्वा सोनार आणि त्यांच्या सहकाऱ्यांनी महात्मा फुले व सावित्रीबाई फुले यांच्या संघर्षाचा जिवंत पट रंगमंचावर उभा केला.

या वैचारिक आणि सांस्कृतिक कार्यक्रमांच्या माध्यमातून समतेचा जागर पिंपरी-चिंचवड शहरात घुमला असून, नागरिकांनी या उपक्रमाला उत्स्फूर्त प्रतिसाद दिला आहे.

© २०२६ मॅक्स मंथन डेली न्यूज. सर्व हक्क राखीव.