निगडी, पिंपरी-चिंचवड (मॅक्स मंथन डेली न्यूज): निगडी परिसरात आज पुन्हा एकदा जलवाहिनी फुटल्याने हजारो लिटर पाण्याची नासाडी झाली आहे. निगडी ते पिंपरी मेट्रो मार्गाच्या कामादरम्यान भक्ति शक्ती उड्डाणपूल ते निगडी गावठाण रस्त्यावर सायंकाळी ६ वाजण्याच्या सुमारास ही घटना घडली. पोर्टलँड मशीनने खोदकाम करत असताना महानगरपालिकेची जलवाहिनी फुटली.
यापूर्वीही याच ठिकाणी मेट्रोच्या कामादरम्यान दोन वेळा जलवाहिन्या फुटल्या होत्या. वारंवार होणाऱ्या या प्रकारांमुळे नागरिकांमध्ये तीव्र असंतोष आहे. उन्हाळ्यात शहरात पाणीटंचाई जाणवत असताना, मेट्रो ठेकेदाराच्या निष्काळजीपणामुळे मोठ्या प्रमाणात पाणी वाया जात आहे.
भारतीय जनता पक्षाचे शहर चिटणीस सचिन काळभोर यांनी या घटनेवर कठोर प्रतिक्रिया दिली आहे. त्यांनी महापालिका आयुक्त शेखर सिंह यांच्या निष्क्रियतेवर प्रश्नचिन्ह उभे केले आहे. वारंवार अशा घटना होऊनही मेट्रो प्रकल्प अधिकाऱ्यांवर कोणतीही कारवाई न झाल्याबद्दल त्यांनी आश्चर्य व्यक्त केले.
सचिन काळभोर यांनी आयुक्तांकडे तातडीने मेट्रो प्रकल्प अधिकाऱ्यांविरोधात फौजदारी गुन्हा दाखल करण्याची मागणी केली आहे. जर महापालिका प्रशासनाने या मागणीकडे दुर्लक्ष केले, तर निगडी परिसरात रास्ता रोको आंदोलन करण्याचा इशारा त्यांनी दिला आहे.
या गंभीर घटनेमुळे मेट्रो प्रशासनाच्या कामाच्या पद्धतीवर गंभीर प्रश्न उभे राहिले आहेत. आता महापालिका आयुक्त या प्रकरणी तातडीने काय भूमिका घेतात, याकडे सर्वांचे लक्ष लागले आहे.
