पिंपरी (मॅक्स मंथन डेली न्यूज): आषाढी वारी पालखी सोहळ्याच्या स्वागतासाठी पिंपरी-चिंचवड सज्ज! पोलीस आणि मनपा प्रशासनाकडून मार्गाची पाहणी पूर्ण!
आषाढी वारी पालखी सोहळ्याच्या आगमनाची तयारी पिंपरी-चिंचवड शहरात अंतिम टप्प्यात आहे. पिंपरी चिंचवडचे पोलीस आयुक्त विनय कुमार चौबे आणि महापालिका आयुक्त शेखर सिंह यांनी आज, मंगळवारी (२७ मे २०२५) पालखी मार्गाची संयुक्त पाहणी केली.
जगद्गुरु संत तुकाराम महाराज पालखी सोहळ्याचे शहरात १९ जून रोजी आगमन होणार असून, या दिवशी पालखी आकुर्डी येथे मुक्काम करणार आहे. तर संतश्रेष्ठ ज्ञानेश्वर महाराज पालखी सोहळ्याचे २० जून रोजी पिंपरी चिंचवड हद्दीत आगमन होईल आणि त्याच दिवशी ती पुण्याकडे प्रस्थान करेल. या दोन्ही पालख्यांच्या स्वागत आणि सुव्यवस्थित नियोजनासाठी पोलीस आणि महापालिका प्रशासन बारकाईने तयारी करत आहे. याच पार्श्वभूमीवर आज प्रशासनाच्या वतीने पालखी मार्गाची पाहणी करण्यात आली.
या पाहणी दौऱ्यात महापालिकेचे शहर अभियंता मकरंद निकम, सह शहर अभियंता बापू गायकवाड, देवन्ना गट्टूवार, उपायुक्त अण्णा बोदडे, राजेश आगळे, सचिन पवार, सहाय्यक आयुक्त उमेश ढाकणे, मुख्य सुरक्षा अधिकारी उदय जरांडे, विशेष अधिकारी किरण गायकवाड, मुख्य आपत्ती व्यवस्थापन अधिकारी ओमप्रकाश बहिवाल, आरोग्य कार्यकारी अधिकारी गणेश देशपांडे, कार्यकारी अधिकारी शिवराज वाडकर, संतोष दुर्गे, अपर पोलीस आयुक्त सारंग आव्हाड, पोलीस उप आयुक्त डॉ. शिवाजी पवार, बापू बांगर यांच्यासह पोलीस आणि महापालिका प्रशासनाचे अनेक उच्च अधिकारी उपस्थित होते.
यावेळी आयुक्त शेखर सिंह यांनी महानगरपालिकेच्या वतीने वारकऱ्यांसाठी पुरवण्यात येणाऱ्या सेवा-सुविधांमध्ये कोणतीही कमतरता राहू नये, यासाठी सर्व विभागांनी समन्वयाने काम करण्याचे निर्देश दिले. तसेच, पालखी मार्गावर पावसाचे पाणी साचणार नाही याची दक्षता घेण्याचे आणि रस्त्यांवरील खड्डे तातडीने बुजण्याचे आदेश त्यांनी दिले. वारकऱ्यांच्या मुक्कामाच्या ठिकाणी आवश्यक त्या सर्व सोयी-सुविधा उपलब्ध करून देण्यावर भर देण्याचेही त्यांनी सांगितले. या पाहणी दरम्यान, पालखी मार्गावर वारकऱ्यांसाठी असलेल्या सुविधांचा सखोल आढावा घेण्यात आला.
एकंदरीत, आषाढी वारीच्या पार्श्वभूमीवर पिंपरी-चिंचवड प्रशासन पूर्णपणे सज्ज झाले असून, वारकऱ्यांचे स्वागत आणि त्यांच्या सोयीसाठी सर्वतोपरी प्रयत्न करत आहे.
