महाराष्ट्रात वाहतूकदारांचा एल्गार: ‘ई-चलान’च्या जाचक नियमांविरोधात मालवाहतूकदारांसह आता बस व्यावसायिकही रस्त्यावर!

मालवाहतूकदारांच्या संपाला बस प्रवासी वाहतूकदारांचा पाठिंबा: ‘ई-चलान’ विरोधात राज्यव्यापी ‘चक्काजाम’ची तीव्रता वाढली!

पुणे, पिंपरी-चिंचवडमध्ये ७५% व्यावसायिकांचा सहभाग; ‘बसवाहतूकदारांसारखाच जीआर’ काढण्याची मुख्यमंत्र्यांकडे मागणी – गौरव कदम, बाबा शिंदे यांचा एल्गार!

पिंपरी, पुणे (दि. ३ जुलै २०२५): मालवाहतूकदारांच्या चुकीच्या ‘ई-चलान’ दंडात्मक कारवाईविरोधात सुरू असलेल्या बेमुदत ‘चक्काजाम’ आंदोलनाची तीव्रता आज आणखी वाढली आहे. मंगळवारी मध्यरात्रीपासून राज्यभर सुरू झालेल्या या आंदोलनाला आता बस प्रवासी वाहतूकदारांनीही पाठिंबा दर्शवला आहे. मुंबईतील जवाहरलाल नेहरू पोर्ट ट्रस्ट (जेएनपीटी) येथे याला १०० टक्के प्रतिसाद मिळाला असून, पुणे आणि पिंपरी-चिंचवड शहर तसेच पुणे जिल्ह्यातील ७५ टक्के व्यावसायिकांनी देखील या चक्काजाम आंदोलनात सहभाग घेतला आहे. ज्याप्रमाणे बस प्रवासी वाहतूकदार व्यवसायिकांना राज्य सरकारने आज जीआर (शासन निर्णय) काढून दिलासा दिला आहे, तसाच जीआर मालवाहतूक व्यवसायिकांसाठी काढण्यात यावा यासाठी मुख्यमंत्री देवेंद्र फडणवीस, उपमुख्यमंत्री एकनाथ शिंदे, परिवहन मंत्री प्रताप सरनाईक यांच्याकडे संघटनेच्या वतीने पाठपुरावा सुरू असल्याची माहिती असोसिएशन ऑफ ट्रान्सपोर्टर्स, पुणे या संस्थेचे अध्यक्ष दिलीप देशमुख यांनी प्रसिद्धीस दिली.

बस प्रवासी वाहतूकदारांना मिळाला दिलासा, आता मालवाहतूकदारांची अपेक्षा

परिवहन आयुक्त, महाराष्ट्र राज्य, मुंबई यांच्या कार्यालयाकडून १२ जुलै २०२५ रोजी (जा.क्र. ७८५३) एक परिपत्रक जारी करण्यात आले आहे. या परिपत्रकात ऑल इंडिया टूरिस्ट परमिट (AITP) असलेल्या प्रवासी बसमधील प्रवाशांना बसमध्ये उतरविणे किंवा चढविण्यासाठी जेवढा वेळ लागेल, तेवढ्या वेळेसाठी वाहन थांबवले असता, त्या वाहनांवर ‘पार्किंग’बाबत कारवाई करण्यात येऊ नये, असे स्पष्ट निर्देश दिले आहेत. परिवहन मंत्री यांच्या अध्यक्षतेखाली दि. २ जुलै २०२५ रोजी मंत्रालयात झालेल्या बैठकीनंतर हा निर्णय घेण्यात आला आहे.

याच धर्तीवर, मालवाहतूकदारांना देखील ‘ई-चलान’च्या जाचक अटींमधून दिलासा मिळावा अशी त्यांची मुख्य मागणी आहे. पुणे बस प्रवासी वाहतूक संघटनेचे अध्यक्ष बाबा शिंदे यांनी या चक्काजाम आंदोलनाला पाठिंबा दर्शवला आहे, ज्यामुळे बंदची तीव्रता आणखी वाढली आहे.

‘ई-चलान’ विरोधात निषेध सभा

असोसिएशन ऑफ ट्रान्सपोर्टर्स, पुणे आणि पुणे बस प्रवासी वाहतूक संघटनेचे अध्यक्ष बाबा शिंदे आणि प्रतिनिधी समवेत गुरुवारी निगडी येथील वाहतूक नगरी येथे एक बैठक आयोजित करण्यात आली होती. या बैठकीनंतर ‘ई-चलान’ प्रणाली विरोधात जोरदार घोषणा देऊन निषेध नोंदविण्यात आला.

या बैठकीला असोसिएशन ऑफ ट्रान्सपोर्टर्स, पुणे संस्थेचे कार्याध्यक्ष गौरव कदम, कार्याध्यक्ष अनिल शर्मा, उपाध्यक्ष सुमित धुमाळ, सचिव अनुज जैन, खजिनदार विनोद जगजंपी, उपाध्यक्ष सतनाम सिंग पन्नू, सह खजिनदार तेजस ढेरे, कोअर कमिटी सदस्य प्रमोद भावसार, सुभाष शर्मा, सुभाष धायल, तसेच इतर वाहतूकदार व्यावसायिकांच्या संघटनांचे प्रतिनिधी उपस्थित होते.

आंदोलनाची तीव्रता वाढणार?

असोसिएशन ऑफ ट्रान्सपोर्टर्स, पुणे या संस्थेचे कार्याध्यक्ष गौरव कदम यांनी सांगितले की, “मालवाहतूकदार व्यावसायिकांच्या ‘ई-चलान’ बाबतच्या मागण्या व इतर प्रश्नांकडे राज्य सरकारने गांभीर्याने पाहावे व सकारात्मक निर्णय घ्यावा, अन्यथा बंदची तीव्रता आणखी वाढेल.”

या राज्यव्यापी बंदमध्ये राज्यातील वाहतूक व्यावसायिकांच्या ३० संघटनांसह पुणे शहर, पिंपरी-चिंचवड शहर तसेच पुणे जिल्ह्यातील सर्व प्रवासी व मालवाहतूक व्यावसायिक स्व-इच्छेने बेमुदत चक्काजाम आंदोलनामध्ये सहभागी झाले आहेत.

या आंदोलनात सहभागी प्रमुख संघटना:

• महाराष्ट्र राज्य ट्रक टेम्पो टँकर्स बस वाहतूक महासंघ
• महाराष्ट्र टेम्पो वेल्फेअर असोसिएशन
• महाराष्ट्र हेवी व्हेईकल अँड इंटरस्टेट कंटेनर ऑपरेटर असोसिएशन
• न्हावा शेवा कंटेनर असोसिएशन
• नवी मुंबई ट्रान्सपोर्ट असोसिएशन
• ठाणे जिल्हा ट्रक टेम्पो टँकर्स बस वाहतूक सेवा संघ
• बॉम्बे गुड्स ट्रान्सपोर्ट असोसिएशन
• रीफर कंटेनर ट्रान्सपोर्टर वेल्फेअर असोसिएशन
• वेस्टर्न इंडिया बल्क एलपीजी ट्रान्सपोर्टर असोसिएशन
• जय भगवान ट्रान्सपोर्ट असोसिएशन
• ऑल इंडिया मोटर काँग्रेस
• महाराष्ट्र नवनिर्माण वाहतूक सेना
• महाराष्ट्र राज्य माल व प्रवासी वाहतूक संघटना
• महाराष्ट्र ट्रक ओनर्स असोसिएशन
• मुंबई मालवाहतूक टेम्पो महासंघ
• बस ओनर्स सेवा संघ (बॉस)
• मुंबई बस वाहतूक महासंघ
• महाराष्ट्र राज्य मोटार मालक संघ
• राष्ट्रीय परिवहन व वाहतूक युनियन
• जय संघर्ष वाहन चालक संस्था
• अखिल महाराष्ट्र राज्य मोटार मालक संघ
• मातोश्री ट्रक टेम्पो चालक-मालक मित्र मंडळ
• भातबाजार ट्रान्सपोर्ट असोसिएशन
• शिव औदुंबर वाहतूक प्रतिष्ठान
• गोळीबार; शिवसाई मित्र मंडळ, असल्फा
• मुंब्रा टेम्पो ओनर्स असोसिएशन
• विश्वगंती मोटर चालक मालक ट्रान्सपोर्ट असोसिएशन
• उलवे ट्रान्सपोर्ट असोसिएशन/शिवनेरी सेवाभावी संस्था
• न्हावा शेवा द्रोणागिरी ट्रान्सपोर्ट ग्रुप
• साकीनाका ट्रक टेम्पो असोसिएशन

या सर्व संघटनांच्या सहभागामुळे या बंदची तीव्रता आणखी वाढत असल्याचे उपाध्यक्ष सुमित धुमाळ आणि सचिव अनुज जैन यांनी सांगितले. यामुळे राज्यातील मालवाहतूक आणि प्रवासी वाहतूक व्यवस्थेवर मोठा परिणाम होण्याची शक्यता आहे.

© २०२५ मॅक्स मंथन डेली न्यूज. सर्व हक्क राखीव.