मूर्तिजापूरमध्ये घरगुती वादातून पतीला पोळपाटने मारहाण! ‘डायल ११२’ मुळे प्रकरण पोलिसांपर्यंत, गुन्हा दाखल!
जेवणाच्या कारणावरून वाद विकोपाला, पत्नी विरोधात गुन्हा दाखल, तपास सुरू
मूर्तिजापूर, प्रतिनिधी : विलास सावळे, दि. २८ जुलै २०२५ ,मॅक्स मंथन डेली न्यूज: अकोला जिल्ह्यातील मूर्तिजापूर शहरात एका घरगुती वादाचे पर्यवसान मारहाणीत झाल्याची घटना समोर आली आहे. जेवण न दिल्याच्या क्षुल्लक कारणावरून पती-पत्नीमध्ये झालेल्या वादानंतर पत्नीने रागाच्या भरात पतीच्या कपाळावर पोळपाटने हल्ला केला, यात पती जखमी झाला. या प्रकरणी, ‘डायल ११२’ वर कॉल करून मदत मागितल्यानंतर पोलिसांनी तात्काळ घटनास्थळी धाव घेतली आणि पत्नीविरोधात गुन्हा दाखल केला आहे.
नेमकी घटना काय घडली?
मोहम्मद जुनेद मोहम्मद अयुब (वय ३९, रा. नालसापुरा, जुनी वस्ती, मूर्तिजापूर) यांनी दिलेल्या फिर्यादीनुसार, दि. २७ जुलै २०२५ रोजी सायंकाळी ७ वाजण्याच्या सुमारास ते त्यांची पत्नी नसरीम परवीन मोहम्मद जुनेद (वय ३५, रा. मूर्तिजापूर) यांच्यासोबत होते. दरम्यान, पत्नीने जेवण न दिल्याच्या कारणावरून दोघांमध्ये जोरदार वाद सुरू झाला. हा वाद इतका विकोपाला गेला की, नसरीम परवीनने रागाच्या भरात घरात ठेवलेला पोळपाट पती मोहम्मद जुनेद यांच्या कपाळावर मारला. यामुळे मोहम्मद जुनेद यांच्या डोक्याला दुखापत होऊन रक्तस्राव झाला.
‘डायल ११२’ वरून मदत आणि पोलिसांची तत्परता
या घटनेनंतर जखमी मोहम्मद जुनेद यांनी तात्काळ ‘डायल ११२’ या पोलीस हेल्पलाइन नंबरवर कॉल करून मदतीची याचना केली. माहिती मिळताच, पोलीस अंमलदारांनी तात्काळ घटनास्थळी धाव घेतली. त्यांनी जखमी मोहम्मद जुनेद यांना LDH मूर्तिजापूर येथील रुग्णालयात उपचारांसाठी दाखल केले. उपचारानंतर त्यांना पोलीस ठाण्यात आणण्यात आले.
पत्नीविरोधात गुन्हा दाखल, तपास सुरू
मोहम्मद जुनेद यांनी दिलेल्या तक्रारीवरून, नाईट ऑफिसर एएसआय १४६६ थाटे साहेब यांच्या आदेशाने, स्टेशन अंमलदार एचसी २२३३ यांनी अप. क्र. ३६५/२०२५, कलम ११८(१) बीएनएस प्रमाणे गुन्हा नोंदवला आहे. या प्रकरणाचा तपास एएसआय गजानन थाटे (ब.नं. १४६६) करत आहेत.
घरगुती वादातून घडलेल्या या घटनेमुळे समाजात चिंता व्यक्त केली जात आहे. कौटुंबिक शांतता राखण्यासाठी संवाद आणि सामंजस्याचे महत्त्व पुन्हा एकदा अधोरेखित झाले आहे.
© २०२५ मॅक्स मंथन डेली न्यूज. सर्व हक्क राखीव.
