सफाई सेवक हे शहराचे ‘खरे हिरो’ – अतिरिक्त आयुक्त विजयकुमार खोराटे
‘अवकारिका’ चित्रपटाच्या विशेष शोमध्ये सफाई कर्मचाऱ्यांच्या योगदानाचा गौरव
पिंपरी, दि. २ ऑगस्ट २०२५: “शहर स्वच्छ ठेवण्यासाठी अहोरात्र झटणारे सफाई सेवक हेच शहराचे खरे हिरो आहेत,” असे प्रतिपादन पिंपरी-चिंचवड महानगरपालिकेचे अतिरिक्त आयुक्त विजयकुमार खोराटे यांनी केले. सफाई कर्मचाऱ्यांच्या संघर्षमय जीवनावर आधारित ‘अवकारिका’ या चित्रपटाचा विशेष शो आयोजित करण्यात आला होता, त्यावेळी ते बोलत होते.
‘अवकारिका’ हा चित्रपट सफाई सेवकांचे रोजचे वास्तव, त्यांच्या कार्यांतील अडचणी, समाजातील अपप्रवृत्तींशी त्यांचा संघर्ष आणि स्वच्छतेसाठीचे समर्पण याचे प्रांजळ आणि प्रभावी चित्रण करतो. हा चित्रपट केवळ एक मनोरंजन नसून, प्रेक्षकांना अंतर्मुख करणारा एक अनुभव आहे, असे सांगत अतिरिक्त आयुक्त खोराटे यांनी चित्रपटाचे कौतुक केले.
स्वच्छता ही प्रत्येकाची जबाबदारी
या कार्यक्रमाची सुरुवात अतिरिक्त आयुक्त खोराटे यांच्या प्रमुख उपस्थितीत झाली. ते म्हणाले, “शहर स्वच्छतेची जबाबदारी केवळ महापालिकेची नसून, प्रत्येक नागरिकाची आहे. स्वच्छता सेवकांच्या मेहनतीला समाजाने योग्य आदर दिला पाहिजे आणि नागरिकांनीही स्वच्छतेच्या मोहिमेत सक्रिय सहभाग घेतला पाहिजे.”
‘स्वच्छ भारत मिशन’ अंतर्गत पार पडलेल्या स्वच्छ सर्वेक्षण २०२४-२५ मध्ये पिंपरी-चिंचवड शहराने देशात ७ वा आणि महाराष्ट्रात १ वा क्रमांक मिळवला आहे. हे मोठे यश महापालिकेच्या कर्मचाऱ्यांच्या अथक प्रयत्नांमुळेच शक्य झाले, असेही त्यांनी सांगितले.
यावेळी पिंपरी-चिंचवड महापालिका उपायुक्त सचिन पवार, सहाय्यक आरोग्य अधिकारी श्रीराम गायकवाड, अंकुश झिटे आणि चित्रपटाचे दिग्दर्शक अरविंद भोसले यांच्यासह अनेक मान्यवर उपस्थित होते.
© 2025 मॅक्स मंथन डेली न्यूज. सर्व हक्क राखीव.
