थेरगाव रुग्णालयात पहिली युरोलॉजी शस्त्रक्रिया यशस्वी!

मूत्रपिंडातील मोठी गाठ काढली; महापालिकेच्या वैद्यकीय विभागाचे मोठे यश

२९ ऑगस्ट २०२५, मॅक्स मंथन डेली न्यूज:

पिंपरी, प्रतिनिधी शाम सोनवणे – पिंपरी-चिंचवड महापालिकेच्या नवीन थेरगाव रुग्णालयात युरोलॉजी विभागातील पहिली मोठी आणि गुंतागुंतीची शस्त्रक्रिया यशस्वी झाली आहे. महापालिकेच्या वैद्यकीय विभागाने हे मोठे यश संपादन केले आहे, ज्यामुळे स्थानिक पातळीवरच नागरिकांना उत्तम उपचार मिळण्याचा मार्ग मोकळा झाला आहे.

वैद्यकीय टीमचा समन्वय

६४ वर्षीय रुग्णाच्या मूत्रपिंडात अनेक गाठी होत्या. या रुग्णाला मधुमेह, हृदयाचा आजार आणि इतर गुंतागुंतीच्या तक्रारीही होत्या. त्यामुळे ही शस्त्रक्रिया अधिक आव्हानात्मक होती. मात्र, भूलतज्ज्ञ (Anesthesia), औषधोपचार (Medicine) आणि युरोसर्जन या सर्व विभागांनी उत्कृष्ट समन्वय साधून हे काम पूर्ण केले.

युरोसर्जन डॉ. सुनील पालवे आणि डॉ. हनुमंत फड यांनी कौशल्यपूर्णपणे १०x१० सेंमी आकाराची मोठी गाठ यशस्वीरीत्या काढून टाकली. शस्त्रक्रियेदरम्यान रुग्णाच्या रक्तातील साखर, रक्तदाब आणि इतर महत्त्वाच्या बाबींवर काटेकोर लक्ष ठेवण्यात आले. डॉ. अर्चना गांधी, डॉ. पूजा कुलकर्णी, डॉ. पूनम माने आणि डॉ. अर्जित रेपुरिया यांनी भूल देण्याची जबाबदारी सांभाळली.

रुग्णांना स्थानिक पातळीवर उत्तम उपचार

ही शस्त्रक्रिया आरोग्य वैद्यकीय अधिकारी डॉ. लक्ष्मण गोफणे यांच्या मार्गदर्शनाखाली आणि अतिरिक्त आरोग्य वैद्यकीय अधिकारी डॉ. अभयचंद्र दादेवार यांच्या नेतृत्वात पार पडली. यावेळी रुग्णालयप्रमुख डॉ. राजेंद्र फिरके आणि डॉ. संजय सोनेकर यांच्यासह ऑपरेशन थिएटरमधील तंत्रज्ञ आणि परिचारिकांचे योगदानही मोलाचे ठरले.

या यशाबद्दल बोलताना अतिरिक्त आयुक्त विजयकुमार खोराटे म्हणाले की, “महापालिकेच्या रुग्णालयांमध्ये अत्याधुनिक वैद्यकीय सुविधा उपलब्ध करून देण्याचा आमचा प्रयत्न आहे, आणि ही शस्त्रक्रिया त्याच प्रयत्नांचा एक भाग आहे. यामुळे नागरिकांना उत्तम उपचार स्थानिक पातळीवरच मिळतील.”

© 2025 मॅक्स मंथन डेली न्यूज. सर्व हक्क राखीव.