हिंजवडी-वाकड उड्डाणपुलावर दुचाकींना बंदी; प्रायोगिक तत्त्वावर नवीन वाहतूक नियम लागू

पीक अवर्समध्ये ‘बॉटलनेक’ टाळण्यासाठी पोलिसांचा निर्णय; नागरिक गोंधळात, पर्यायी मार्ग जाहीर

पिंपरी-चिंचवड, प्रतिनिधी शाम सोनवणे ११ सप्टेंबर २०२५, मॅक्स मंथन डेली न्यूज:

पिंपरी-चिंचवड पोलिसांच्या वाहतूक शाखेने हिंजवडी येथील भुजबळ चौक ते वाकड उड्डाणपूल दुचाकी वाहनांसाठी तात्पुरत्या स्वरूपात बंद केला आहे. या निर्णयाची अंमलबजावणी आज (गुरुवार) सकाळपासून प्रायोगिक तत्त्वावर करण्यात आली आहे. यासंदर्भात कोणतेही अधिकृत परिपत्रक जारी न झाल्याने नागरिकांमध्ये मोठा गोंधळ उडाला होता.

पीक अवर्समध्येच बंदी

हा नियम पुढील काही दिवसांसाठी, किमान पंधरवड्यासाठी सुरू राहील, असे हिंजवडी वाहतूक पोलिसांनी सांगितले आहे. दुचाकींसाठी ही बंदी केवळ पीक अवर्समध्ये म्हणजेच, सकाळी ८ ते ११ आणि सायंकाळी ५ ते ९ या वेळेत लागू करण्यात आली आहे.

या निर्णयाबद्दल बोलताना हिंजवडी वाहतूक विभागाचे पोलीस निरीक्षक राहुल सोनावणे म्हणाले, “आम्ही सकाळपासून लाऊडस्पीकरद्वारे याची घोषणा करत आहोत. हा उड्डाणपूल अरुंद असून, त्याला मधोमध दुभाजक नाही. आम्हाला वाटते की, या पुलावरून फक्त चारचाकी वाहनांना परवानगी दिल्यास वाहतुकीची कोंडी (बॉटलनेक) टाळता येईल.”

दुचाकींसाठी पर्यायी मार्ग कोणते?

• वाकड बाजूकडून हिंजवडीकडे जाणाऱ्यांसाठी: उड्डाणपुलावरून न जाता, डावीकडे वळून सूर्य अंडरपासमधून यू-टर्न घ्यावा. हा एक छोटासा (५०-१०० मीटर) वळसा आहे.
• हिंजवडी बाजूकडून वाकडकडे जाणाऱ्यांसाठी: उड्डाणपुलावरून न जाता, डावीकडे वळून सायाजी अंडरपासमधून यू-टर्न घ्यावा. हा वळसाही सुमारे ५०-१०० मीटरचा आहे.

वाहतूक पोलिसांनी नागरिकांना सूचना केल्या आहेत की, जर वाहतूक कोंडी संबंधित कोणतीही समस्या आढळल्यास त्यांनी तातडीने हिंजवडी वाहतूक विभागाला कळवावे. या दुचाकी बंदीवर काही आक्षेप किंवा सूचना असल्यास, त्या भुजबळ चौकातील हिंजवडी वाहतूक विभाग कार्यालयात किंवा चिंचवड गाव येथील एल्पो मॉलसमोरील वाहतूक शाखा मुख्यालयात सादर करता येतील.

© 2025 मॅक्स मंथन डेली न्यूज. सर्व हक्क राखीव.