हृदयद्रावक घटना! पिंपरी-चिंचवडमध्ये पाणी भरताना भूमिगत टाकीत पडून ५२ वर्षीय महिलेचा मृत्यू
चिंचवडच्या मोहननगरमध्ये दुर्गा रेसिडेन्सीतील घटना; पोलिसांकडून तपास सुरू
पिंपरी चिंचवड, प्रतिनिधी बालाजी नवले, दि. ३१ ऑक्टोबर २०२५, मॅक्स मंथन डेली न्यूज:
पिंपरी-चिंचवडमधील एका गृहनिर्माण संस्थेत शुक्रवारी पाणी भरत असताना, भूमिगत पाण्याच्या टाकीत पडून एका ५२ वर्षीय महिलेचा दुर्दैवी मृत्यू झाल्याची धक्कादायक घटना समोर आली आहे. या घटनेमुळे परिसरात हळहळ व्यक्त होत आहे.
मिळालेल्या माहितीनुसार, मृत महिलेचे नाव आशा संजय गवळी (वय ५२) असे असून, त्या चिंचवड, मोहननगर येथील दुर्गा रेसिडेन्सीच्या रहिवासी होत्या. शुक्रवारी सकाळी इमारतीच्या आवारात असलेल्या पिण्याच्या पाण्याच्या टाकीतून पाणी भरत असताना त्यांचा तोल गेला आणि त्या पाण्यात पडल्या, अशी प्राथमिक माहिती आहे.
घटनेची माहिती मिळताच पोलिसांनी तातडीने तपास सुरू केला आहे. महिलेचा मृतदेह शवविच्छेदनासाठी पिंपरी येथील यशवंतराव चव्हाण स्मृती रुग्णालयात (YCMH) पाठवण्यात आला आहे.
या घटनेमुळे गेल्या वर्षी हडपसरमध्ये घडलेल्या एका अशाच घटनेची आठवण झाली आहे. गेल्या वर्षी पुण्याच्या फुरसुंगी परिसरात एका २५ वर्षीय महिलेचा मृतदेह पाण्याच्या टँकरमध्ये आढळून आला होता. त्या घटनेत, कौसल्या मुकेश चव्हाण (वय २५) या पहाटे घरातून कोणालाही न सांगता निघून गेल्या होत्या. त्यांची शोधाशोध सुरू असतानाच, टँकरचा चालक पाणी भरत असताना त्याला पाण्याच्या प्रवाहात अडथळा जाणवला. त्याने झाकण उघडून तपासले असता, आतमध्ये कौसल्या यांचा मृतदेह आढळला होता.
© २०२५ मॅक्स मंथन डेली न्यूज. सर्व हक्क राखीव.
