दहावी-बारावी परीक्षांसाठी मोठी बातमी! बारावी (HSC) बोर्ड परीक्षेसाठी अर्ज भरण्याची विलंब शुल्कासह अंतिम मुदतवाढ
४ ते १० नोव्हेंबर २०२५ या काळात ऑनलाईन अर्ज सादर करा; मंडळाचे संकेतस्थळ उपलब्ध
अमरावती, प्रतिनिधी अविनाश वानखेडे, दि. ९ नोव्हेंबर २०२५, मॅक्स मंथन डेली न्यूज:
महाराष्ट्र राज्य माध्यमिक व उच्च माध्यमिक शिक्षण मंडळामार्फत घेण्यात येणाऱ्या उच्च माध्यमिक प्रमाणपत्र (इ. १२ वी.) फेब्रुवारी-मार्च २०२६ च्या परीक्षेसाठी आवेदनपत्रे (परीक्षा अर्ज) भरण्याची प्रक्रिया सुरू आहे. ज्या विद्यार्थ्यांनी अद्याप अर्ज भरले नाहीत, त्यांच्यासाठी मंडळाने विलंब शुल्कासह अर्ज सादर करण्याच्या तारखांना अंतिम मुदतवाढ दिली आहे.
राज्य मंडळाचे सचिव दीपक माळी यांनी प्रसिद्धीपत्रकाद्वारे ही माहिती दिली आहे. ही संपूर्ण प्रक्रिया ऑनलाईन पद्धतीने होणार असून, विद्यार्थ्यांनी त्यांचे अर्ज संबंधित कनिष्ठ महाविद्यालय प्रमुखांमार्फत सादर करावेत, असे आवाहन करण्यात आले आहे.
बारावी बोर्डाच्या परीक्षेसाठी अर्ज भरण्याबाबतचा सुधारित तपशील खालीलप्रमाणे आहे:
| तपशील | कालावधी |
| विलंब शुल्कासह ऑनलाईन आवेदनपत्रे भरण्याचा कालावधी | ४ ते १० नोव्हेंबर २०२५ |
| परीक्षा शुल्क RTGS/NEFT द्वारे मंडळाकडे भरण्याचा कालावधी | ४ ते ११ नोव्हेंबर २०२५ |
| कनिष्ठ महाविद्यालयांनी याद्या व प्रिलिस्ट विभागीय मंडळाकडे जमा करण्याची अंतिम मुदत | १२ नोव्हेंबर २०२५ |
व्यवसाय अभ्यासक्रम घेणारे नियमित विद्यार्थी, सर्व शाखांचे पुनर्परिक्षार्थी (Repeaters), नावनोंदणी प्रमाणपत्र प्राप्त झालेले खाजगी विद्यार्थी, तसेच श्रेणीसुधार योजनेंतर्गत (Class Improvement Scheme) व तुरळक विषय, आयटीआय विषय घेऊन प्रविष्ट होऊ इच्छिणाऱ्या विद्यार्थ्यांची परीक्षेची आवेदनपत्रे त्यांच्या कनिष्ठ महाविद्यालयामार्फत प्रचलित पद्धतीने भरावयाची आहेत.
सविस्तर माहिती आणि अनुषंगिक सूचनांसाठी विद्यार्थ्यांनी मंडळाच्या www.mahahsscboard.in या अधिकृत संकेतस्थळाचे नियमित अवलोकन करण्याचे आवाहन मंडळाने केले आहे.
© २०२५ मॅक्स मंथन डेली न्यूज. सर्व हक्क राखीव.
