पिंपरी-चिंचवडमध्ये मोठी कारवाई! दोन ‘स्पा सेंटर’ एका वर्षासाठी सीलबंद

सार्वजनिक ठिकाणी वेश्याव्यवसाय चालवल्याप्रकरणी पोलीस आयुक्तांचा कठोर निर्णय; सांगवी आणि वाकड पोलीस ठाण्याच्या हद्दीतील कारवाई

पिंपरी चिंचवड प्रतिनिधी बालाजी नवले, दि. १० नोव्हेंबर २०२५, मॅक्स मंथन डेली न्यूज:

पिंपरी-चिंचवड आयुक्तालयाच्या हद्दीत सार्वजनिक ठिकाणी अनैतिक मानवी वाहतूक प्रतिबंधक कायद्याचे (Immoral Traffic Prevention Act) उल्लंघन करून वेश्याव्यवसाय चालवणाऱ्या दोन स्पा सेंटरवर पोलीस प्रशासनाने कठोर कारवाई केली आहे. मा. पोलीस आयुक्त विनय कुमार चौबे यांनी या दोन्ही स्पा सेंटरना एक वर्षासाठी बंद करण्याचे आदेश दिले आहेत.

पोलिसांना मिळालेल्या माहितीनुसार, सार्वजनिक ठिकाणी असलेल्या या दोन्ही स्पा सेंटरमध्ये वेश्याव्यवसाय सुरू होता. दोन्ही पोलीस ठाण्यांनी गुन्हा दाखल करून आरोपींना अटक केली होती.

सांगवी आणि वाकड पोलीस ठाण्यांकडून स्पा बंद करण्याबाबतचे प्राप्त झालेले प्रस्ताव विचारात घेऊन, पोलीस आयुक्त विनय कुमार चौबे यांनी दोन्ही प्रकरणांची प्राथमिक चौकशी केली.

• निष्कर्ष: नमूद गुन्ह्यातील कागदपत्रे आणि प्राथमिक चौकशीअंती दोन्ही स्पा सेंटरचे चालक/मालक हे त्यांच्या स्पा सेंटरमध्ये वेश्याव्यवसाय चालवत असल्याचे आढळून आले.
• आदेश: या गंभीर नोंदीनंतर मा. पोलीस आयुक्त विनय कुमार चौबे यांनी NEW OM SPA आणि RUPEN SPA हे दोन्ही स्पा सेंटर दिनांक ०७/११/२०२५ पासून ०१ वर्षासाठी बंद करण्याचे आदेश जारी केले आहेत.

सार्वजनिक ठिकाणी गैरकृत्ये आणि वेश्याव्यवसाय चालवणाऱ्यांवर कठोर प्रशासकीय कारवाई करण्याचा इशारा या आदेशातून देण्यात आला आहे.

© २०२५ मॅक्स मंथन डेली न्यूज. सर्व हक्क राखीव.