तुमचे नाव यादीत आहे का? पिंपरी-चिंचवड महापालिकेकडून सर्व क्षेत्रीय कार्यालयांमध्ये मतदारांसाठी याद्या उपलब्ध

फ क्षेत्रीय कार्यालयासह सर्वत्र याद्या पाहण्याची सोय; पंकज भाळकर, सीमा सावळे, गणेश लंगोटे, अजित गव्हाणे यांच्यासह अनेक आक्षेपांमुळे मतदारांना पडताळणीचे आवाहन

पिंपरी प्रतिनिधी शाम सोनवणे, दि. २४ नोव्हेंबर २०२५, मॅक्स मंथन डेली न्यूज: 

पिंपरी चिंचवड महानगरपालिकेच्या (PCMC) आगामी सार्वत्रिक निवडणुकीच्या तयारीसाठी प्रशासनाकडून स्वीप (SVEEP) उपक्रमांतर्गत विविध पाऊले उचलली जात आहेत. याच अनुषंगाने, मतदारांना त्यांचे नाव यादीत आहे की नाही, तसेच नावात किंवा पत्त्यात काही त्रुटी आहेत का, हे तपासता यावे यासाठी महापालिकेच्या वतीने शहरातील सर्व क्षेत्रीय कार्यालयांमध्ये मतदार याद्या उपलब्ध करून देण्यात आलेल्या आहेत.

नागरिकांनी संबंधित क्षेत्रीय कार्यालयात जाऊन आपल्या विभागाची मतदार यादी तपासावी आणि आवश्यक असल्यास सुधारणांसाठी अर्ज करावा, असे आवाहन महापालिकेकडून करण्यात आले आहे.

शहरातील ‘फ’ क्षेत्रीय कार्यालयामध्ये नागरिकांची मतदार यादी पाहण्यासाठी मोठी गर्दी झाली होती. (यावेळी फ क्षेत्रीय कार्यालयातील कर्मचाऱ्यांनी नागरिकांना सहकार्य करून त्यांचे नाव शोधण्यास मदत केली.)

महापालिकेने नुकतीच प्रारूप मतदार यादी (Draft Voter List) प्रसिद्ध केल्यानंतर, यादीत मोठ्या प्रमाणात त्रुटी असल्याच्या तक्रारी राजकीय पक्षांनी आणि इच्छुक उमेदवारांनी केल्या होत्या.

• माजी राष्ट्रवादी काँग्रेसचे नगरसेवक पंकज भालेकर यांनी त्यांचा स्वतःचा आणि प्रभागातील मतदारांचा समूह शेजारच्या प्रभागात समाविष्ट केल्याची तक्रार केली होती.

• माजी भाजप नगरसेविका सीमा सावळे यांनीही, प्रभाग ८ मधील झोपडपट्टी भागातील सुमारे ४,५०० मतदार प्रभाग ९ मध्ये वर्ग केल्याचा आक्षेप घेतला होता.

• प्रभाग १४ मधून निवडणूक लढवण्यास इच्छुक असलेले गणेश लंगोटे यांनी त्यांच्या प्रभागातील १७०० हून अधिक मतदार प्रभाग १० मध्ये गेल्याचे निदर्शनास आणले होते.

• माजी राष्ट्रवादी काँग्रेसचे नगरसेवक अजित गव्हाणे यांनीही अशा त्रुटी जवळजवळ सर्वच प्रभागात असल्याचे सांगत प्रशासनाच्या कार्यपद्धतीवर प्रश्नचिन्ह उपस्थित केले होते.

या सर्व पार्श्वभूमीवर, महापालिकेने सर्व क्षेत्रीय कार्यालयांमध्ये याद्या उपलब्ध करून दिल्याने, मतदारांना स्वतःच्या नावाची आणि माहितीची अचूकता तपासण्याची ही सुवर्णसंधी मिळाली आहे. याद्यांमधील त्रुटी दूर करण्यासाठी नागरिकांच्या सहभागाची अत्यंत गरज आहे.

सर्व मतदारांनी आपल्या क्षेत्रीय कार्यालयात जाऊन लवकरात लवकर मतदार यादी तपासावी आणि आपला मतदानाचा हक्क बजावण्यासाठी सज्ज व्हावे.

© २०२५ मॅक्स मंथन डेली न्यूज. सर्व हक्क राखीव.