शेतकऱ्यांनो, सज्ज व्हा! ‘फार्मर कप’ स्पर्धेसाठी अमरावतीत प्रशिक्षण शिबिर संपन्न

कृषी विभाग, आत्मा आणि पाणी फाउंडेशनचा संयुक्त उपक्रम; ‘महाविस्तार AI ॲप’चे प्रात्यक्षिक

अमरावती, प्रतिनिधी अविनाश वानखेडे, दि. २९ नोव्हेंबर २०२५, मॅक्स मंथन डेली न्यूज:

‘सत्यमेव जयते फार्मर कप २०२६’ या राज्यव्यापी स्पर्धेसाठी अमरावती तालुक्यातील शेतकऱ्यांमध्ये उत्साह निर्माण करण्यासाठी नुकतेच एक दिवसीय प्रशिक्षण शिबिर आयोजित करण्यात आले होते. कृषी विभाग, आत्मा (ATMA) आणि पाणी फाउंडेशन यांच्या संयुक्त विद्यमाने अमरावती येथील तहसील कार्यालयाच्या सभागृहात पार पडलेल्या या प्रशिक्षणाला तालुक्यातील शेतकऱ्यांनी उत्स्फूर्त प्रतिसाद दिला.

या प्रशिक्षण शिबिराचा मुख्य उद्देश शेतकऱ्यांना ‘सत्यमेव जयते फार्मर कप २०२६’ या स्पर्धेसाठी सज्ज करणे आणि पाणी फाउंडेशनच्या कार्याची व स्पर्धेची सविस्तर माहिती देणे हा होता.

यावेळी कृषी अधिकारी प्राजक्ता तायडे यांनी उपस्थित शेतकऱ्यांसाठी ‘महाविस्तार AI ॲप’ची माहिती देऊन, शेतकऱ्यांकडून ते ॲप डाउनलोड करून त्याची नोंदणी करून घेतली. या आधुनिक तंत्रज्ञानाचा वापर शेतीत कसा करता येईल, याबद्दल मार्गदर्शन करण्यात आले.

पाणी फाउंडेशन टीममधील प्रशिक्षक जयकुमार सोनुले यांनी संस्थेच्या कार्याची माहिती दिली, तर प्रफुल्ल कोल्हे यांनी शेतकऱ्यांसाठी गट शेतीचे महत्त्व, गट शेतीच्या पद्धती तसेच गटांमधील शेतकऱ्यांनी घ्यावयाच्या पिकांबद्दल सविस्तर मार्गदर्शन केले.

या प्रशिक्षणादरम्यान पुढे होणाऱ्या तीन दिवसीय निवासी प्रशिक्षणाची माहितीही देण्यात आली, जेणेकरून शेतकरी प्रत्यक्ष स्पर्धेसाठी अधिक तयारी करू शकतील. प्रशिक्षणाच्या शेवटी पाणी फाउंडेशन टीमने शेतकऱ्यांच्या सर्व शंकांचे निरसन केले. प्रशिक्षक रेणुका पोहोकार आणि प्रशांत देवरे यांनी यावेळी निवासी प्रशिक्षणासाठी इच्छुक शेतकऱ्यांची नोंदणी करून घेतली.

या प्रशिक्षणास कृषी विभागातील सर्व मंडळ कृषी अधिकारी, उपकृषी अधिकारी, सहाय्यक कृषी अधिकारी, पोकरा गावातील कृषी ताई तसेच शेतकरी मोठ्या संख्येने उपस्थित होते.

कार्यक्रमाचे प्रास्ताविक तालुका कृषी अधिकारी प्रशांत गुल्हाने यांनी केले. कार्यक्रमाचे सूत्रसंचालन तालुका तंत्रज्ञान व्यवस्थापक रुपाली चौधरी यांनी केले, तर आभार मंडळ कृषी अधिकारी नीतिमान व्यवहारे यांनी मानले.

© २०२५ मॅक्स मंथन डेली न्यूज. सर्व हक्क राखीव.