पिंपळे सौदागरच्या कमर्शियल इमारतीत भीषण आग! कोचिंग क्लासेसच्या इमारतीतून ६ जणांची सुखरूप सुटका

प्राईम स्क्वेअर इमारतीच्या चौथ्या मजल्यावर शॉर्ट सर्किटमुळे लागलेल्या आगीवर अग्निशमन दलाची तत्पर कारवाई; मोठी दुर्घटना टळली

पिंपरी चिंचवड प्रतिनिधी बालाजी नवले, दि. २ डिसेंबर २०२५, मॅक्स मंथन डेली न्यूज:

पिंपरी-चिंचवड शहरातील पिंपळे सौदागर, कुणाल आयकॉन रोड येथील “प्राइम स्क्वेअर” या बहुमजली कमर्शियल इमारतीमध्ये सोमवारी (१ डिसेंबर २०२५) दुपारी पावणे तीनच्या सुमारास भीषण आग लागली. इमारतीच्या चौथ्या मजल्यावर असलेल्या निकिता राय चालवत असलेल्या एका खासगी कोचिंग क्लासेसमध्ये ही आग लागली होती. घटनेची माहिती मिळताच पिंपरी चिंचवड महापालिकेच्या अग्निशमन विभागाने तत्परता दाखवत अवघ्या काही मिनिटांत आग आटोक्यात आणली आणि आगीमधून सहा जणांची सुखरूप सुटका केली.

आगीच्या घटनेची माहिती मिळताच पिंपरी येथील मुख्य अग्निशमन केंद्र, थेरगाव उप अग्निशमन केंद्र आणि नेहरूनगर अग्निशमन केंद्रातील प्रत्येकी एक पथक, असे एकूण चार अग्निशमन पथके तातडीने घटनास्थळी रवाना झाले. आगीच्या ज्वाळा आणि मोठ्या प्रमाणात धूर यामुळे बचाव कार्यात अडथळे येत होते, परंतु अग्निशमन दलाच्या जवानांनी साहस दाखवत इमारतीत प्रवेश केला.

• बचावकार्य: इमारतीच्या चौथ्या मजल्यावरील कोचिंग क्लासेसमध्ये एकूण बेचाळीस विद्यार्थी होते, पण सुदैवाने आग लागली तेव्हा क्लासेस बंद झाला होता (सकाळी १० ते दु. २:३० वाजेपर्यंत क्लासेस चालतो). मात्र, इमारतीच्या पाचव्या मजल्यावर आतमध्ये अडकलेल्या सहा जणांची जवानांनी सुखरूप सुटका केली. या घटनेत कोणालाही जीवितहानी झालेली नाही.

• आगीचे कारण: कोचिंग क्लासेसमध्ये शॉर्ट सर्किट झाल्याने आग लागल्याचे प्राथमिक कारण समोर आले आहे.

या कारवाईमध्ये अग्निशमन विभागाचे वरिष्ठ अधिकारी ऋषिकांत चिपाडे, उप अग्निशमन अधिकारी विनायक नाळे, गौतम इंगवले, प्रभारी उपअधिकारी रुपेश जाधव, वाहनचालक मयूर कुंभार, विशाल बानेकर, दत्तात्रय रोकडे, मारुती गुजर, अग्निशमन विभागाच्या महिला कर्मचारी स्नेहा जगताप यांच्यासह इतर जवान सहभागी झाले होते.

अतिरिक्त आयुक्त विजयकुमार खोराटे यांनी स्थानिकांनी आणि अग्निशमन विभागाने दाखवलेली तत्परता कौतुकास्पद असल्याचे सांगितले. “अग्निशमन दलाने दाखवलेले धैर्य, संयम आणि सतर्कता अत्यंत उल्लेखनीय आहे,” असे विजयकुमार खोराटे म्हणाले.

उपायुक्त व्यंकटेश दुर्वास म्हणाले की, “संकटाच्या क्षणी योग्य वेळी दिलेला प्रतिसाद, शांतपणे घेतलेले निर्णय आणि दृढ मनोबल यामुळेच मोठा अनर्थ टळला. ही कारवाई आमच्या दलाच्या तयारीची आणि शहराच्या सुरक्षेच्या बांधिलकीची जिवंत साक्ष आहे.”

अग्निशमन अधिकारी ऋषिकांत चिपाडे यांनी आगीची संभाव्य व्याप्ती मोठी असल्याचे सांगितले. “सदर कमर्शियल बिल्डिंग मधील अन्य व्यवसायांच्या ग्राहकांची गर्दी असती तर आणि लगतच्या इमारतीमध्ये आग पसरली असती तर परिस्थितीवर नियंत्रण ठेवणे खूपच अवघड झाले असते,” असे ऋषिकांत चिपाडे यांनी नमूद केले. ते पुढे म्हणाले की, नागरिकांच्या सुरक्षिततेच्या दृष्टीने पिंपळे सौदागर परिसरात अग्निशमन केंद्राची नितांत आवश्यकता असून, त्याबाबत वरिष्ठ स्तरावर त्वरेने कार्यवाही होणे आवश्यक आहे.

अग्निशमन विभागाकडून नागरिकांना कोणत्याही आपत्कालीन परिस्थितीत १०१ या आपत्कालीन क्रमांकावर संपर्क साधण्याचे आवाहन करण्यात आले आहे.

© २०२५ मॅक्स मंथन डेली न्यूज. सर्व हक्क राखीव.