अवैध वाळू वाहतुकीवर महसूल विभागाची धडक! अमरावतीत ५ हायवा ट्रक जप्त
जिल्हा खनिकर्म अधिकारी प्रणीता चापले यांच्यासह पथकाची रात्रीची गस्त; पाचही हायवा पुढील कारवाईसाठी तहसील कार्यालयात जमा
अमरावती, प्रतिनिधी अविनाश वानखेडे, दि. ३ डिसेंबर २०२५, मॅक्स मंथन डेली न्यूज:
अमरावती तालुक्यात अवैध गौण खनिज (वाळू) उपसा आणि वाहतुकीला आळा घालण्यासाठी महसूल विभागाने सोमवारी रात्री (दिनांक २ डिसेंबर २०२५) मोठी धडक कारवाई केली. या कारवाईत अवैध रेतीची वाहतूक करणारे पाच हायवा ट्रक जप्त करण्यात आले असून, ते पुढील कार्यवाहीसाठी अमरावती तहसील कार्यालयात लावण्यात आले आहेत.
अवैध गौण खनिज वाहतुकीला आळा घालण्यासाठी प्रशासनाकडून भरारी पथकांद्वारे वाहनांची नियमित तपासणी करण्यात येत आहे. दिनांक २ डिसेंबर २०२५ रोजी रात्री जिल्हा खनिकर्म अधिकारी प्रणीता चापले, उपविभागीय अधिकारी अनिल भटकर, तहसीलदार विजय लोखंडे यांचे पथक अमरावती-डवरगाव रस्त्यावर गस्तीवर असताना ही कारवाई करण्यात आली.
वाहन तपासणी दरम्यान, पथकाला एमएच २७ डीटी ९३६६, एमएच २७ डीटी ६४९४, एमएच २७ डीटी ४५५५, एमएच २७ डीएल ६४९४ आणि एमएच २७ डीटी १४८० क्रमांकाचे हायवा ट्रक अवैधरीत्या रेतीची वाहतूक करताना आढळून आले. पथकाने पाचही ट्रक मुद्देमालासह तातडीने जप्त केले.
सदर कारवाईत मंडळ अधिकारी सुनील उगले, गजानन हिवसे, ग्राम महसूल अधिकारी सुनील भगत, हेमंत गावंडे, रामकृष्ण इंगळे, पवन बोंडे, रामदास गोडे आणि पोलीस यांनी सहभाग घेतला.
© २०२५ मॅक्स मंथन डेली न्यूज. सर्व हक्क राखीव.
