धमकी आणि दादागिरी प्रकरणी कठोर कारवाई करा! युवासेना उपशहरप्रमुखाने पोलीस आयुक्तांकडे केली लेखी तक्रार

महानगरपालिकेच्या आरक्षित भूखंडावर क्रिकेट स्पर्धा आयोजित करताना गिरीश गोपाळ कुटे यांनी शिवीगाळ करत जीवे मारण्याची दिली धमकी

पिंपरी प्रतिनिधी शाम सोनवणे, दि.१० डिसेंबर २०२५, मॅक्स मंथन डेली न्यूज:

पिंपरी-चिंचवड शहरात शिवसेना (उद्धव बाळासाहेब ठाकरे) पक्षाचे युवासेना उपशहरप्रमुख निखिल उमाकांत दळवी यांनी पिंपरी-चिंचवड पोलीस आयुक्तांकडे लेखी तक्रार केली आहे. आकुर्डी येथील विठ्ठलवाडी परिसरात महानगरपालिकेकडून भाड्याने घेतलेल्या भूखंडावर क्रिकेट स्पर्धेचे आयोजन करताना गिरीश गोपाळ कुटे नावाच्या व्यक्तीने दादागिरी करत शिवीगाळ आणि धक्काबुक्की केली, तसेच जीवे मारण्याची धमकी दिल्याचा गंभीर आरोप निखिल उमाकांत दळवी यांनी केला आहे.

• आयोजन: निखिल उमाकांत दळवी यांनी शिवसेना (उद्धव बाळासाहेब ठाकरे) पक्षाच्या वतीने ठाकरे शिवसेना चषक हाफ पीच क्रिकेट टूर्नामेंट स्पर्धा आयोजित केली आहे.

• जागेचे आरक्षण: आकुर्डीमधील विठ्ठलवाडी येथील विठ्ठल रुक्मिणी मंदिरासमोरील संत तुकाराम महाराज पालखी तळ हा आरक्षित भूखंड त्यांनी पिंपरी-चिंचवड महानगरपालिकेच्या ‘अ’ क्षेत्रीय कार्यालयाकडून १० ते १५ डिसेंबर या पाच दिवसांसाठी भाडेतत्त्वावर घेतला आहे. यासाठी १३,०८० रुपये भाडे भरल्याचे त्यांनी तक्रारीत नमूद केले आहे.

• धमकीची घटना: मंगळवार, दिनांक ०९/१२/२०२५ रोजी रात्री १० वाजण्याच्या सुमारास निखिल उमाकांत दळवी हे मंडपवाले आणि सहकाऱ्यांसोबत जागेची मोजमाप घेण्यासाठी गेले असता, तिथे गिरीश गोपाळ कुटे आले. त्यांनी निखिल उमाकांत दळवी यांना दादागिरी करण्यास सुरुवात केली, शिवीगाळ केली आणि तीन वेळा धक्का देऊन ढकलून दिले.

• जीवे मारण्याची धमकी: गिरीश गोपाळ कुटे यांनी हा भूखंड “आमच्या मालकीचा आहे, आम्हाला विचारल्याशिवाय इथे कोणताही कार्यक्रम करायचा नाही, मारणार पण आणि मारून टाकणार पण” अशी धमकी दिली. त्यांनी निखिल उमाकांत दळवी यांना “तुम्ही इथं पोटभरासाठी बाहेरून आलेले भाडेकरू आहात, नीट राहायचं नाहीतर सांगतो तुम्हाला,” असे धमकावले.

निखिल उमाकांत दळवी यांनी तात्काळ रात्री ११२ या पोलीस तक्रार क्रमांकावर १०.१० वाजता फोन करून घटनेची माहिती दिली. त्यानंतर पोलीस घटनास्थळी आले आणि त्यांनी निगडी पोलीस स्टेशनमध्ये लेखी तक्रार देण्यास सांगितले. त्यानुसार निखिल उमाकांत दळवी यांनी निगडी पोलीस स्टेशनला फिर्याद दिली आहे.

निखिल उमाकांत दळवी यांनी पोलीस आयुक्तांना विनंती केली आहे की, गिरीश गोपाळ कुटे यांच्याकडून माझ्या जीवितास धोका आहे. भविष्यात माझ्या जीवाचे काही बरे-वाईट झाल्यास त्यासाठी गिरीश गोपाळ कुटे यांना जबाबदार धरावे. या घटनेची गंभीर दखल घेऊन, योग्य ती कायदेशीर कारवाई करून, दखलपात्र गुन्हा दाखल करावा.

(सोबत काल दिलेल्या एन सी आर तक्रार कॉफीची प्रत जोडण्यात आली आहे.)

© २०२५ मॅक्स मंथन डेली न्यूज. सर्व हक्क राखीव.