केंद्रीय अर्थसंकल्प २०२६: सीएनजी आणि कॅन्सरवरील औषधे स्वस्त, तर दारू कडू! परदेश प्रवास आता होणार सुखकर

नवी दिल्ली , १ फेब्रुवारी २०२६ | मॅक्स मंथन डेली न्यूज:

नवी दिल्ली : केंद्रीय अर्थमंत्री निर्मला सीतारामन यांनी आज संसदेत सलग नवव्यांदा आणि स्वतंत्र भारताच्या इतिहासात पहिल्यांदाच रविवारी अर्थसंकल्प सादर केला. पूर्णपणे ‘पेपरलेस’ असलेल्या या २०२६-२७ च्या अर्थसंकल्पातून सामान्य नागरिकांना महागाईपासून दिलासा देण्याचा प्रयत्न करण्यात आला आहे. आरोग्यापासून ते इंधनापर्यंत अनेक क्षेत्रात कर कपात करण्यात आली असली, तरी मद्यप्रेमींसाठी मात्र हा अर्थसंकल्प खिसा रिकामा करणारा ठरला आहे.

पर्यटन क्षेत्राला चालना देण्यासाठी सरकारने परदेश प्रवास पॅकेजवर लागणारा TCS (Tax Collected at Source) ५% ते २०% वरून थेट २% पर्यंत खाली आणला आहे. यामुळे आता भारतीयांना परदेशात जाणे आणि तिकडील खर्च करणे अधिक स्वस्त होणार आहे.

कॅन्सरशी झुंज देणाऱ्या रुग्णांसाठी या अर्थसंकल्पातून मोठी भेट मिळाली आहे.

• कॅन्सरवरील १७ औषधांवरील ‘बेसिक कस्टम ड्युटी’ पूर्णपणे माफ करण्यात आल्याने ही औषधे स्वस्त होतील.

• ७ दुर्मिळ आजारांवरील औषधांच्या आयातीवरही शुल्क सवलत देण्यात आली आहे.

• मधुमेहाची (शुगर) औषधेही स्वस्त होणार असल्याने लाखो रुग्णांना दिलासा मिळेल.

पगारदार वर्गाला यंदाच्या अर्थसंकल्पातून आयकरात मोठ्या सवलतीची अपेक्षा होती, मात्र कर रचनेत कोणताही मोठा बदल करण्यात आलेला नाही. सरकारने नवीन प्राप्तीकर कायदा २०२५ च्या अंमलबजावणीवर भर दिला असून, सध्याचे टॅक्स स्लॅब स्थिर ठेवले आहेत. केवळ ‘इन्कम टॅक्स ॲक्ट’ अधिक सोपा करण्यावर भर दिला जाणार असल्याचे अर्थमंत्र्यांनी स्पष्ट केले.

• डिजिटल इंडिया: शाळांमध्ये ‘कंटेंट क्रिएटर लॅब’ उभारल्या जातील.

• ऊर्जा: सोलर एनर्जीशी संबंधित उपकरणे आणि इलेक्ट्रिक वाहनांच्या बॅटरीवरील आयात शुल्क कमी केल्याने हरित ऊर्जेला प्रोत्साहन मिळेल.

• मच्छीमार व व्यापार: कुरिअर सेवा आणि मच्छीमारांसाठी निर्यात सुलभ व स्वस्त करण्यासाठी तरतूद करण्यात आली आहे.

© २०२६ मॅक्स मंथन डेली न्यूज. सर्व हक्क राखीव.