पुणे: औंध रोडवर रस्ता ओलांडताना पीएमपी बसची धडक; ७५ वर्षीय महिलेचा मृत्यू, मैत्रिण जखमी
पुणे, २ फेब्रुवारी २०२६ | मॅक्स मंथन डेली न्यूज:
पुणे : औंध रोडवरील केंद्रीय विद्यालयासमोर रस्ता ओलांडताना पीएमपी बसने दिलेल्या धडकेत एका ७५ वर्षीय ज्येष्ठ महिलेचा जागीच मृत्यू झाला. चंद्रकला ज्ञानोबा वाव्हळ (वय ७५, रा. इंदिरा वसाहत, औंध रोड) असे मृत महिलेचे नाव आहे. या अपघातात त्यांची मैत्रिण प्रभावती भोसले (वय ७४) या जखमी झाल्या आहेत.
मिळालेल्या माहितीनुसार, चंद्रकला वाव्हळ आणि प्रभावती भोसले या दोघी मैत्रिणी शुक्रवारी (३० जानेवारी) कामानिमित्त शिवाजीनगरला गेल्या होत्या. रात्री सव्वानऊच्या सुमारास त्या पीएमपी बसने परत औंध रोडवर आल्या. बस थांब्यावर उतरल्यानंतर रस्ता ओलांडत असताना पाठीमागून येणाऱ्या दुसऱ्या एका भरधाव पीएमपी बसने त्यांना जोरात धडक दिली.
या अपघातानंतर चंद्रकला वाव्हळ यांचा मृत्यू झाला, तर प्रभावती भोसले यांच्यावर उपचार सुरू आहेत. याप्रकरणी प्रभावती भोसले यांनी दिलेल्या फिर्यादीवरून चतु:शृंगी पोलिसांनी पीएमपी बस चालकाविरुद्ध गुन्हा दाखल केला आहे. पोलीस उपनिरीक्षक चेतन धनवडे या प्रकरणाचा अधिक तपास करत आहेत.
पुणे शहरात पीएमपी बसच्या अपघातांचे सत्र वाढत असल्याने ज्येष्ठ नागरिकांच्या आणि पादचाऱ्यांच्या सुरक्षेचा प्रश्न पुन्हा एकदा ऐरणीवर आला आहे.
© २०२६ मॅक्स मंथन डेली न्यूज. सर्व हक्क राखीव.
