युवकांनो, अर्थसंकल्प जाणून घ्या आणि धोरणकर्त्यांशी संवाद साधा! ‘माय भारत बजेट क्वेस्ट’ स्पर्धेचे आयोजन; १७ फेब्रुवारीपर्यंत नोंदणीची संधी

पिंपरी प्रतिनिधी शाम सोनवणे, ७ फेब्रुवारी २०२६ | मॅक्स मंथन डेली न्यूज:

अमरावती : देशाच्या केंद्रीय अर्थसंकल्पाबद्दल (यूनियन बजेट) युवकांमध्ये जागरूकता निर्माण करण्यासाठी आणि त्यांना देशाच्या अर्थव्यवस्थेशी जोडण्यासाठी ‘मेरा युवा भारत’ (MY Bharat) कार्यालयामार्फत ‘माय भारत बजेट क्वेस्ट’ या विशेष उपक्रमाचे आयोजन करण्यात आले आहे. या मोहिमेत सहभागी होऊन युवकांना थेट धोरणकर्त्यांशी संवाद साधण्याची सुवर्णसंधी मिळणार आहे.

हा कार्यक्रम अत्यंत सहभागी स्वरूपात आणि तीन महत्त्वाच्या टप्प्यांत आयोजित करण्यात आला आहे:

१. पहिला टप्पा (ऑनलाईन क्विझ): ३ ते १७ फेब्रुवारी २०२६ या कालावधीत राष्ट्रीय स्तरावर ऑनलाईन प्रश्नमंजुषा स्पर्धा होईल. यासाठी युवकांनी ‘माय भारत’ पोर्टलवर नोंदणी करणे आवश्यक आहे.

२. दुसरा टप्पा (निबंध लेखन): क्विझमध्ये उत्कृष्ट कामगिरी करणाऱ्या विद्यार्थ्यांची निवड राज्य आणि केंद्रशासित प्रदेश स्तरावर निबंध लेखनासाठी केली जाईल. यामध्ये युवक ‘केंद्रीय अर्थसंकल्प २०२६’ मधील प्रमुख विषयांवर आपले विचार मांडतील.

३. अंतिम टप्पा (आभासी संवाद): निवडलेल्या तरुणांना केंद्रीय अर्थसंकल्पावर काम करणाऱ्या देशातील महत्त्वाच्या धोरणकर्त्यांशी आणि मान्यवरांशी थेट संवाद (Virtual Interaction) साधण्याची संधी मिळेल.

जिल्हा युवा अधिकारी स्नेहल बासुतकर यांनी दिलेल्या माहितीनुसार, इच्छुक युवकांनी तात्काळ ‘माय भारत’ पोर्टलवर जाऊन आपली नोंदणी पूर्ण करावी. अर्थसंकल्पातील तरतुदी सामान्यांपर्यंत पोहोचवण्यासाठी आणि युवकांचे योगदान वाढवण्यासाठी हा उपक्रम मैलाचा दगड ठरणार आहे.

• स्पर्धेचा कालावधी: ३ ते १७ फेब्रुवारी २०२६.

• नोंदणी माध्यम: माय भारत पोर्टल (MY Bharat Portal).

अमरावती जिल्ह्यातील तसेच महाराष्ट्रातील जास्तीत जास्त युवकांनी या बौद्धिक युद्धात सहभागी होऊन आपले अर्थविषयक ज्ञान अजमावावे, असे आवाहन प्रशासनातर्फे करण्यात आले आहे.

© २०२६ मॅक्स मंथन डेली न्यूज. सर्व हक्क राखीव.