मराठ्यांच्या देदिप्यमान इतिहासाचा जागर! पुण्यात ‘दिल्ली विजय आणि पानिपत बदला विजयसोहळा’ उत्साहात; मान्यवरांच्या हस्ते इतिहासप्रेमींचा गौरव

पुणे/पिंपरी प्रतिनिधी , १२ फेब्रुवारी २०२६ | मॅक्स मंथन डेली न्यूज:

पुणे : मराठ्यांच्या शौर्य, पराक्रम आणि ऐतिहासिक विजयाची स्मृती जागवणारा ‘दिल्ली विजय आणि पानिपत बदला विजयसोहळा’ नुकताच पुण्यात मोठ्या उत्साहात पार पडला. भारत इतिहास संशोधक मंडळ व श्री देवदेवेश्वर संस्थान यांच्या संयुक्त विद्यमाने आयोजित हा सोहळा इतिहासप्रेमींसाठी एक मोठी पर्वणी ठरली.

कार्यक्रमाची सुरुवात छत्रपती शिवाजी महाराज यांच्या पुतळ्यास पुष्प अर्पण करून करण्यात आली. त्यानंतर थोरले माधवराव पेशवे, महादजी शिंदे आणि तुकोजी होळकर यांच्या प्रतिमांचे पूजन मान्यवरांच्या हस्ते झाले. १७६१ च्या पानिपतच्या पराभवानंतर अवघ्या काही वर्षांत मराठ्यांनी दिल्लीवर पुन्हा भगवा फडकवून जो ‘बदला’ घेतला, त्या गौरवशाली इतिहासाचे स्मरण यावेळी करण्यात आले.

या सोहळ्याचे मुख्य आकर्षण म्हणजे भारतीय वायुसेनेचे निवृत्त अधिकारी आणि इतिहास अभ्यासकांची उपस्थिती होते. यावेळी खालील मान्यवरांचा विशेष सत्कार करण्यात आला:

• एअर चीफ मार्शल प्रदीप वसंत नाईक (निवृत्त): यांनी मराठ्यांच्या शिस्तबद्ध रणनितीचा गौरव केला.

• एअर मार्शल भूषण गोखले (निवृत्त): यांनी पानिपतनंतरच्या विजयाचे ऐतिहासिक आणि लष्करी महत्त्व विषद केले.

• उत्तमराव शिंदे सरकार: वानवडी येथील महादजी शिंदे छत्री येथे गेल्या ८ वर्षांपासून ‘पानिपत शौर्य दिवस’ राबवल्याबद्दल त्यांचा विशेष गौरव झाला.

कार्यक्रमाला ज्येष्ठ इतिहासतज्ज्ञ पांडुरंग बलकवडे, पुष्करसिंह पेशवे, अभिमन्यू होळकर आणि रणजितसिंह गुरुड यांची प्रमुख उपस्थिती होती. या सर्वांनी मराठा साम्राज्याच्या पुनरुत्थानावर आपली मते मांडली. हा विजय केवळ लष्करी नसून तो स्वाभिमान आणि आत्मविश्वासाचा विजय असल्याचे मत एअर मार्शल भूषण गोखले यांनी अध्यक्षीय भाषणात व्यक्त केले.

कार्यक्रमाचे प्रास्ताविक रमेश भागवत यांनी केले, सूत्रसंचालन गुरुप्रसाद कानिटकर यांनी तर आभार प्रदर्शन नंदकुमार निकम यांनी मानले. यावेळी शिंदे सरकार यांचे चाहते आणि इतिहासप्रेमी मोठ्या संख्येने उपस्थित होते.

© २०२६ मॅक्स मंथन डेली न्यूज. सर्व हक्क राखीव.