अमरावतीत रंगणार राज्यस्तरीय खादी महोत्सव! २० फेब्रुवारीपासून ‘व्होकल फॉर लोकल’चा जागर; दर्जेदार खादी उत्पादनांची मोठी मेजवानी
अमरावती/नागपूर, १६ फेब्रुवारी २०२६ | मॅक्स मंथन डेली न्यूज:
अमरावती/नागपूर : खादी आणि ग्रामोद्योग आयोगाच्या वतीने अमरावती शहरात भव्य ‘राज्यस्तरीय खादी प्रदर्शन व महोत्सवा’चे आयोजन करण्यात आले आहे. २० फेब्रुवारी ते १ मार्च २०२६ या कालावधीत होणाऱ्या या महोत्सवाच्या माध्यमातून महात्मा गांधींचे ग्राम स्वराज्याचे स्वप्न आणि पंतप्रधान नरेंद्र मोदी यांचा ‘व्होकल फॉर लोकल’ हा मंत्र साकारला जाणार आहे.
नागपूर विभागीय कार्यालयांतर्गत होणारे हे प्रदर्शन अमरावतीतील संत गाडगे बाबा समाधी स्थळ यात्री मैदान, गाडगे नगर (वालगाव रोड) येथे भरणार आहे. विदर्भातील नागरिकांसाठी देशभरातील उत्कृष्ट खादी आणि ग्रामोद्योग उत्पादने एकाच छताखाली पाहण्याची आणि खरेदी करण्याची ही सुवर्णसंधी आहे.
खादी आणि ग्रामोद्योग आयोग ही सूक्ष्म, लघु आणि मध्यम उद्यम मंत्रालय (MSME), भारत सरकार अंतर्गत कार्यरत असलेली वैधानिक संस्था आहे. या प्रदर्शनाचे मुख्य उद्दिष्ट ग्रामीण कारागिरांना रोजगार मिळवून देणे, त्यांच्या उत्पादनांना बाजारपेठ उपलब्ध करून देणे आणि त्यांना आर्थिकदृष्ट्या सक्षम करणे हे आहे. ‘पंतप्रधान रोजगार निर्मिती कार्यक्रम’ आणि ‘स्फुर्ती क्लस्टर’ अंतर्गत तयार झालेल्या विविध लघु उद्योगांचे स्टॉल्स या महोत्सवात आकर्षणाचे केंद्र ठरतील.
“देशभरातील उद्योजकांचा आत्मविश्वास वाढवण्यासाठी आणि स्वावलंबी भारताच्या दिशेने पाऊल टाकण्यासाठी अमरावतीकरांनी या प्रदर्शनाला मोठ्या संख्येने भेट द्यावी. या ठिकाणी उत्कृष्ट दर्जाची खादी वस्त्रे आणि ग्रामीण उत्पादने थेट कारागिरांकडून खरेदी करता येतील,” असे आवाहन खादी ग्रामोद्योग आयोग, नागपूरचे संचालक यांनी केले आहे.
या महोत्सवामुळे विदर्भातील सर्वसामान्य जनतेला खादी संस्कृतीशी जोडले जाण्याची आणि ग्रामीण कारागिरांच्या हाताला काम देण्याची संधी मिळणार आहे.
© २०२६ मॅक्स मंथन डेली न्यूज. सर्व हक्क राखीव.
