बाणेर: ब्रह्माकुमारीजमध्ये ‘अर्धनारीश्वर’ जिवंत देखाव्यातून स्त्री-पुरुष समानतेचा जागर! तृप्ती देसाई यांच्या हस्ते आरोग्य शिबिराचा शुभारंभ

पिंपरी/पुणे पिंपरी प्रतिनिधी आकाश कांबळे, १६ फेब्रुवारी २०२६ | मॅक्स मंथन डेली न्यूज:

पुणे : महाशिवरात्रीचे औचित्य साधून बाणेर येथील ब्रह्माकुमारीज केंद्रात ‘सहस्र शिवलिंग दर्शन’ आणि ‘अर्धनारीश्वर’ जिवंत देखाव्याचे आयोजन करण्यात आले होते. या माध्यमातून स्त्री-पुरुष समानतेचा मोलाचा संदेश देण्यात आला असून, या उपक्रमाचे कौतुक भूमाता ब्रिगेडच्या अध्यक्षा तृप्ती देसाई यांनी केले. रायकर फार्म हाऊस, बाणेर येथील केंद्रात आयोजित आरोग्य व रक्तदान शिबिराच्या शुभारंभ प्रसंगी त्या बोलत होत्या.

तृप्ती देसाई पुढे म्हणाल्या की, “भूमाता ब्रिगेडच्या माध्यमातून आम्ही महिलांना त्यांचे हक्क मिळवून देण्यासाठी सदैव कार्यरत असतो. महिलांनी स्वबळावर आपले कर्तृत्व साकार करावे, याची प्रचिती ब्रह्माकुमारीजमध्ये येते. येथे महिला अत्यंत सक्षमपणे सर्व कार्यभार सांभाळताना दिसत आहेत, जे समाजासाठी प्रेरणादायी आहे.”

महाशिवरात्रीनिमित्त केवळ आध्यात्मिकच नव्हे, तर सामाजिक बांधिलकी देखील जपण्यात आली.

• रक्तदान: शिबिरात एकूण ४८ नागरिकांनी रक्तदान करून आपला सहभाग नोंदवला.

• तपासणी: शेकडो नागरिकांनी विनामूल्य आरोग्य तपासणीचा लाभ घेतला.

• मार्गदर्शन: नाडी चिकित्सक डॉ. मंगेश यांचे विशेष मार्गदर्शन सत्र यावेळी संपन्न झाले.

या कार्यक्रमास चित्रपट दिग्दर्शिका व डान्सर वैशाली जाधव, संजय कृष्णा रायकर, घनशाम रायकर, बाणेर शाखेच्या संचालिका डॉ. त्रिवेणी दिदी, सकाळनगर शाखेच्या संचालिका बी.के. गीता दिदी यांच्यासह आरोग्य शिबिरातील डॉक्टर आणि ब्रह्माकुमारीजचे सदस्य मोठ्या संख्येने उपस्थित होते.

आध्यात्मिक वातावरणात शिवभक्तांनी सहस्र शिवलिंगांचे आणि अर्धनारीश्वर जिवंत देखाव्याचे दर्शन घेण्यासाठी मोठी गर्दी केली होती.

© २०२६ मॅक्स मंथन डेली न्यूज. सर्व हक्क राखीव.