किवळेमध्ये शिवविचारांचा महासागर लोटणार! प्रा. विक्रम कदम यांचे व्याख्यान आणि पोवाड्यांच्या निनादात रंगणार शिवजन्मोत्सव सोहळा
पिंपरी चिंचवड प्रतिनिधी बालाजी नवले, १८ फेब्रुवारी २०२६ | मॅक्स मंथन डेली न्यूज:
किवळे : हिंदवी स्वराज्याचे संस्थापक छत्रपती शिवाजी महाराज यांची जयंती किवळे परिसरात अत्यंत देदीप्यमान स्वरूपात साजरी करण्यात येणार आहे. किवळे येथील जय श्रीराम चौक, शिवशंभो कॉलनी, आदर्श नगर येथे सालाबादप्रमाणे यावर्षीही भव्य शिवजन्मोत्सवाचे आयोजन करण्यात आले असून, यानिमित्ताने शिवविचारांचा महासागर किवळेकरांना अनुभवायला मिळणार आहे.
उत्सवाची सुरुवात अत्यंत पारंपरिक आणि मंगलमय वातावरणात होणार आहे. सकाळी निगडी येथील भक्ती-शक्ती समूह शिल्प येथून शिवभक्तांच्या वतीने शिवज्योत घेऊन येण्यात येणार आहे. त्यानंतर स्थानिक महिला आणि भगिनींच्या हस्ते शिवजन्माचा पाळणा सोहळा संपन्न होईल. विश्ववंदनीय छत्रपती शिवाजी महाराज यांच्या पुतळ्यास पुष्पहार अर्पण करून आणि जिजाऊ वंदनेने या सोहळ्याचा अधिकृत प्रारंभ केला जाणार आहे.
शिवरायांचे विचार नव्या पिढीपर्यंत पोहोचावेत, या उद्देशाने परिसरातील लहान मुलांसाठी पोवाडे गायन आणि शिवचरित्रावर आधारित भाषण स्पर्धेचे आयोजन करण्यात आले आहे. या माध्यमातून चिमुकल्यांच्या स्वरातून स्वराज्याचा इतिहास पुन्हा एकदा जिवंत होणार आहे.
कार्यक्रमाचे मुख्य आकर्षण सायंकाळी होणार आहे. सायंकाळी ७ ते ९:३० या वेळेत “कुळवाडी भूषण बहुजन प्रतिपालक विश्ववंदनीय छत्रपती शिवाजी महाराज यांचा जीवन-संघर्ष आणि शिवचरित्रातून आज आपण काय शिकावे?” या विषयावर इतिहासाचे गाढे अभ्यासक आणि प्रसिद्ध शिवचरित्रकार प्रा. विक्रम कदम यांचे व्याख्यान आयोजित करण्यात आले आहे. सध्याच्या काळात शिवरायांच्या व्यवस्थापन कौशल्याची आणि जीवन संघर्षाची गरज युवकांना कशी आहे, याचा ऊहापोह या व्याख्यानातून केला जाईल.
या ऐतिहासिक सोहळ्यासाठी किवळे आणि परिसरातील नागरिकांनी मोठ्या संख्येने उपस्थित राहून कार्यक्रमाची शोभा वाढवावी, असे आवाहन संभाजी ब्रिगेडचे शहराध्यक्ष प्रवीण कदम आणि भ्रष्टाचार निर्मूलन समितीचे अध्यक्ष महेश शिंदे पाटील यांनी केले आहे.
संपूर्ण किवळे परिसरात या सोहळ्याच्या निमित्ताने उत्साहाचे वातावरण असून, शिवभक्तांनी भगवे झेंडे आणि कमानी लावून परिसराचे सुशोभीकरण केले आहे.
© २०२६ मॅक्स मंथन डेली न्यूज. सर्व हक्क राखीव.
