पिंपरी-चिंचवडकरांनो पाणी जपून वापरा! सोमवारी शहराचा पाणीपुरवठा पूर्णतः बंद; निगडी जलशुद्धीकरण केंद्रावर देखभाल दुरुस्तीचे काम
पिंपरी प्रतिनिधी आकाश कांबळे, २१ फेब्रुवारी २०२६ | मॅक्स मंथन डेली न्यूज:
पिंपरी : पिंपरी-चिंचवड शहरातील नागरिकांसाठी महत्त्वाची बातमी आहे. निगडी येथील सेक्टर २३ मधील जलशुद्धीकरण केंद्रावर तातडीची स्थापत्य व विद्युत विषयक देखभाल दुरुस्तीची कामे हाती घेतली जाणार आहेत. यामुळे सोमवार, २३ फेब्रुवारी २०२६ रोजी संपूर्ण शहराचा पाणीपुरवठा तात्पुरता बंद ठेवण्यात येणार असल्याची माहिती महापालिका प्रशासनाने दिली आहे.
महापालिकेच्या पाणीपुरवठा विभागाने दिलेल्या माहितीनुसार, या कामांमुळे सोमवारी (२३ फेब्रुवारी) शहरातील सर्व भागांचा संध्याकाळचा पाणीपुरवठा पूर्णतः बंद असेल. तसेच, दुरुस्तीच्या कामांचा परिणाम म्हणून दुसऱ्या दिवशी म्हणजे मंगळवारी (२४ फेब्रुवारी) सकाळचा पाणीपुरवठा देखील अनियमित आणि कमी दाबाने होण्याची दाट शक्यता आहे.
शहरातील पाणीपुरवठा वितरण व्यवस्थेत भविष्यात कोणताही खंड पडू नये, यासाठी ही देखभाल दुरुस्ती करणे अत्यावश्यक आहे. या कालावधीत नागरिकांनी आपल्याकडील उपलब्ध पाण्याचा पुरेसा साठा करून ठेवावा आणि पाण्याचा वापर अत्यंत काटकसरीने करावा, असे आवाहन करण्यात आले आहे.
या संदर्भात बोलताना अतिरिक्त आयुक्त विक्रांत बगाडे म्हणाले की, “देखभाल दुरुस्तीची कामे वेळेत पूर्ण करून पाणीपुरवठा पुन्हा सुरळीत करण्यासाठी महापालिका प्रशासन प्रयत्नशील आहे. पाणीपुरवठ्यातील या तात्पुरत्या अडचणीसाठी नागरिकांनी प्रशासनाला सहकार्य करावे.”
प्रशासनाच्या या निर्णयामुळे नागरिकांनी रविवारपासूनच पाण्याचे नियोजन करणे गरजेचे आहे, जेणेकरून सोमवारी आणि मंगळवारी होणारी गैरसोय टाळता येईल.
© २०२६ मॅक्स मंथन डेली न्यूज. सर्व हक्क राखीव.
