हरवलेली १२१ मुले पुन्हा पालकांच्या कुशीत! पिंपरी-चिंचवड पोलिसांची ‘ऑपरेशन मुस्कान’मध्ये चमकदार कामगिरी; आयुक्त विनयकुमार चौबे यांच्या मार्गदर्शनाखाली मोहिमेला यश

पिंपरी चिंचवड प्रतिनिधी बालाजी नवले, २६ फेब्रुवारी २०२६ | मॅक्स मंथन डेली न्यूज:

चिंचवड : पिंपरी-चिंचवड पोलीस आयुक्तालयाच्या वतीने राबविण्यात आलेल्या ‘ऑपरेशन मुस्कान-१४’ या विशेष शोध मोहिमेला मोठे यश आले आहे. गेल्या एक महिन्यात पोलिसांनी अथक परिश्रम घेऊन विविध कारणांनी हरवलेल्या आणि पळवून नेलेल्या एकूण १२१ बालकांचा (२७ मुले आणि ९४ मुली) शोध घेऊन त्यांना सुखरूपपणे त्यांच्या पालकांच्या स्वाधीन केले आहे. या कामगिरीमुळे अनेक कुटुंबांमधील हरवलेली ‘मुस्कान’ (हास्य) पुन्हा परतली आहे.

अपर पोलीस महासंचालक (महिला व बाल अपराध प्रतिबंध, महाराष्ट्र राज्य) यांच्या सूचनेनुसार संपूर्ण राज्यात २० जानेवारी ते २० फेब्रुवारी २०२६ या कालावधीत ही मोहीम राबविण्यात आली होती.

पोलीस आयुक्त विनयकुमार चौबे यांनी या मोहिमेत स्वतः वैयक्तिक लक्ष घालून सर्व पोलीस ठाण्यांना आणि गुन्हे शाखेला तपासाच्या स्पष्ट सूचना दिल्या होत्या.

• जुन्या गुन्ह्यांचा शोध: २०१८ पासून २० जानेवारी २०२६ पर्यंतच्या कालावधीत हरवलेल्या २१४ बालकांपैकी (३० मुले व १८४ मुली) पोलिसांनी शोध घेऊन ७१ बालकांना पालकांच्या ताब्यात दिले.

• ताज्या प्रकरणांत यश: मोहीम सुरू असताना (२० जानेवारी ते २० फेब्रुवारी) दाखल झालेल्या ७२ प्रकरणांपैकी ५० बालकांचा (१६ मुले व ३४ मुली) यशस्वीरीत्या शोध घेण्यात आला.

  अशा प्रकारे मोहिमेदरम्यान एकूण १२१ बालकांना त्यांच्या हक्काचे घर मिळवून देण्यात पोलिसांना यश आले.

ही मोहीम यशस्वी करण्यासाठी सर्व पोलीस ठाण्यांचे वरिष्ठ पोलीस निरीक्षक, विभागीय सहाय्यक पोलीस आयुक्त आणि विशेषतः अनैतिक मानवी वाहतूक प्रतिबंध कक्ष (AHTU), गुन्हे शाखा यांनी विशेष तांत्रिक तपास आणि गुप्त बातमीदारांच्या मदतीने ही शोधकार्य पूर्ण केले.

सदरची कामगिरी पोलीस आयुक्त श्री. विनयकुमार चौबे, सह पोलीस आयुक्त श्री. शशिकांत महावरकर, अपर पोलीस आयुक्त श्री. सारंग आव्हाड आणि श्री. बसवराज तेली यांच्या मार्गदर्शनाखाली सर्व पोलीस उपआयुक्त व सहाय्यक आयुक्तांच्या पथकाने केली आहे.

मुले हरवल्यास किंवा संशयास्पद हालचाली आढळल्यास नागरिकांनी तातडीने पोलिसांशी संपर्क साधावा, असे आवाहन पोलीस प्रशासनाकडून करण्यात आले आहे.

© २०२६ मॅक्स मंथन डेली न्यूज. सर्व हक्क राखीव.