उच्चशिक्षित तरुणांचा पोल्ट्री व्यवसायातून ‘प्रोटीन डे’चा जागर! सालतवाडा जिल्हा परिषद शाळेत विद्यार्थ्यांना प्रथिनांच्या महत्त्वाचे मार्गदर्शन; चिकन रोस्टेडचे वाटप
अकोला /मुर्तिजापुर प्रतिनिधी विलास सावळे, ०१ मार्च २०२६ | मॅक्स मंथन डेली न्यूज:
सालतवाडा : बदलत्या जीवनशैलीत शरीराला आवश्यक असलेल्या प्रथिनांचे (प्रोटीन) महत्त्व पटवून देण्यासाठी ग्राम सालतवाडा येथे ‘प्रोटीन डे’ मोठ्या उत्साहात साजरा करण्यात आला. पियुष दादाराव पाचडे यांच्या पोल्ट्री फार्मवर आणि जिल्हा परिषद शाळेत आय.बी. कंपनीच्या (मूर्तीजापूर ऑफिस) सहकार्याने हा विशेष उपक्रम राबवण्यात आला. प्रथिनांची कमतरता दूर व्हावी आणि ग्रामीण भागातील मुलांमध्ये आरोग्याप्रति जागरूकता निर्माण व्हावी, हा या कार्यक्रमाचा मुख्य उद्देश होता.
आय.बी. कंपनीचे ब्रांच मॅनेजर मंगेश येवले, लाईन सुपरवायझर आशिष जाधव आणि कॉम्प्युटर ऑपरेटर शिवाजी शित्ररे यांनी जिल्हा परिषद शाळेतील विद्यार्थ्यांना मार्गदर्शन केले. शरीराच्या वाढीसाठी आणि व्याधीमुक्तीसाठी प्रोटीनची किती गरज आहे, तसेच ते अंड्यातून आणि मांसाहारातून कशा प्रकारे मुबलक प्रमाणात मिळते, याची शास्त्रीय माहिती त्यांनी दिली. याप्रसंगी सर्व विद्यार्थ्यांना प्रथिनयुक्त ‘चिकन रोस्टेड’ खाण्यासाठी देऊन त्यांचे आरोग्यवर्धक स्वागत करण्यात आले.
या कार्यक्रमाचे विशेष आकर्षण ठरले ते पाचडे कुटुंब. सेवानिवृत्त लाईनमन दादाराव पाचडे हे गोरेगाव शिवारातील आपल्या शेतात गेल्या ५ वर्षांपासून पोल्ट्री फार्म चालवत आहेत. त्यांना त्यांची दोन्ही मुले मोलाचे सहकार्य करत आहेत. मोठा मुलगा शुभम पाचडे (BE) आणि लहान मुलगा पियुष पाचडे (BSC) हे दोन्ही उच्चशिक्षित तरुण नोकरीच्या मागे न धावता स्वतःचा व्यवसाय समर्थपणे सांभाळत आहेत. उच्च शिक्षण घेऊन शेतीपूरक व्यवसायातून प्रगती करणाऱ्या या भावंडांनी ग्रामीण तरुणांसमोर एक नवा आदर्श निर्माण केला आहे.
या सोहळ्याला शाळेचे मुख्याध्यापक सारसे सर, डाबेराव सर, सोळंके सर, वानखडे मॅडम, वरघत मॅडम उपस्थित होत्या. तसेच ग्रामस्थ बाळू चहकार, संदीप नेसनेस्कार, सत्यवान वानखडे, बबलू श्रीनाथ, शरद इंगोले, अंबादास चहाकार, रामू वानखडे, प्रमोद वानखडे, अंकुश नागे, शुभम अरज यांसह मोठ्या संख्येने महिला व नागरिक हजर होते.
© २०२६ मॅक्स मंथन डेली न्यूज. सर्व हक्क राखीव.
