किवळे गृहप्रकल्पात महापालिकेच्या चुकीचा फटका कष्टकऱ्यांना! ६ लाखांचे घर आता १३ लाखांवर; मुद्रांक शुल्क माफीसाठी कष्टकरी संघर्ष महासंघाचे आयुक्तांना साकडे

पिंपरी प्रतिनिधी आकाश कांबळे, ०५ मार्च २०२६ | मॅक्स मंथन डेली न्यूज:

पिंपरी : पिंपरी-चिंचवड महानगरपालिकेच्या नियोजनातील त्रुटी आणि विलंबामुळे पंतप्रधान आवास योजनेतील कष्टकरी लाभार्थ्यांना मोठा आर्थिक भुर्दंड सहन करावा लागत आहे. रावेत येथील रखडलेल्या प्रकल्पाऐवजी आता किवळे येथे सदनिका देण्यात येत असल्या तरी, त्यांच्या किमतीत झालेली दुप्पट वाढ अन्यायकारक आहे. या पार्श्वभूमीवर, कष्टकरी संघर्ष महासंघाच्या वतीने आज पालिका आयुक्त श्रावण हर्डीकर यांची भेट घेऊन लाभार्थ्यांना दिलासा देण्याची मागणी करण्यात आली.

महानगरपालिकेने पाच वर्षांपूर्वी रावेत येथे ९३४ सदनिकांचा प्रकल्प मंजूर केला होता. त्यावेळी या घराची किंमत ६ लाख ९५ हजार रुपये निश्चित करण्यात आली होती. मात्र, प्रशासकीय चुकांमुळे हा प्रकल्प पूर्ण होऊ शकला नाही. आता महापालिका किवळे येथील प्रकल्पात या लाभार्थ्यांना घरे देत असून, त्याची किंमत १३ लाख ७१८ रुपये इतकी लावण्यात आली आहे. एका कष्टकरी कुटुंबासाठी ही वाढीव रक्कम भरणे अशक्य असल्याचे महासंघाने निदर्शनास आणून दिले.

१. मुद्रांक शुल्क माफी: लाभार्थी आर्थिकदृष्ट्या दुर्बल घटकातील असल्याने त्यांना मुद्रांक शुल्क (Stamp Duty) पूर्णपणे माफ करण्यात यावे.

२. अनुदान लाभ: शासकीय योजना असल्याने या प्रकल्पासाठी ‘पीएमएवाय’ (PMAY) चे अनुदान तातडीने मिळावे.

३. हप्ता भरण्यास मुदतवाढ: ९० टक्के रक्कम भरण्यासाठी लाभार्थ्यांना वाढीव मुदत देण्यात यावी.

४. हस्तांतरण अट रद्द करा: सदनिका हस्तांतरित करण्यासाठी ५० टक्के रक्कम भरण्याची अट शिथिल करावी.

कामगार नेते काशिनाथ नखाते यांच्या नेतृत्वाखाली झालेल्या या चर्चेदरम्यान, तत्कालीन आयुक्त शेखर सिंह यांनी केलेल्या सकारात्मक पत्रव्यवहाराची आठवण करून देण्यात आली. आयुक्त श्रावण हर्डीकर यांनी या विषयावर लवकरच स्वतंत्र बैठक घेऊन लाभार्थ्यांना दिलासादायक निर्णय घेण्याचे आश्वासन दिले आहे.

याप्रसंगी राजेश माने, अमृत पाटील, नरसिंग माने, सुरेश धानेकर, शुभांगी चव्हाण, ज्योती बिद्री, प्रीती गोहाड, विनोद गायकवाड यांच्यासह अनेक कष्टकरी उपस्थित होते.

© २०२६ मॅक्स मंथन डेली न्यूज. सर्व हक्क राखीव।