‘ॲग्रीवाईज’ परिषदेमुळे भारतीय शेतीमालाला जागतिक बाजारपेठ मिळणार! पुणे बिजनेस स्कूलमध्ये ५ वी राष्ट्रीय परिषद संपन्न; कृषी क्षेत्रातील प्रगत तंत्रज्ञानावर भर
पिंपरी प्रतिनिधी आकाश कांबळे, ०५ मार्च २०२६ | मॅक्स मंथन डेली न्यूज:
पिंपरी : “पारंपरिक शेती पद्धतीत बदल करून प्रगत तंत्रज्ञानाचा अवलंब केल्यास कृषी उत्पादनाचा दर्जा निश्चितच उंचावेल. ‘ॲग्रीवाईज’ सारख्या परिषदांमुळे शेतकऱ्यांच्या उत्पादनाला जागतिक बाजारपेठेत मोठी संधी उपलब्ध होईल, ज्यामुळे ग्रामीण विकासाचे ध्येय साध्य करणे सहज शक्य होईल,” असे प्रतिपादन स्नेल इंटिग्रल प्रा. लि. चे एपीएसी प्रमुख जुआन बेनावेंटे यांनी केले.
पिंपरी चिंचवड एज्युकेशन ट्रस्टच्या (PCET) पुणे बिजनेस स्कूल (PBS) मध्ये “वाढती मूल्ये आणि त्याचे सशक्तिकरण” या संकल्पनेवर आधारित ‘पाचवी ॲग्रीवाईज राष्ट्रीय परिषद २०२६’ दिमाखात संपन्न झाली. या परिषदेत देशभरातील कृषी तज्ज्ञ, उद्योजक आणि संशोधक मोठ्या संख्येने उपस्थित होते.
या परिषदेत पोल्ट्री फेडरेशन ऑफ इंडियाचे रिकी थापर, दीपक फर्टीलायझरचे अमित खरे आणि महाधन ॲग्रीटेकच्या निधी सिंह यांसह अनेक मान्यवरांनी मार्गदर्शन केले. पीबीएसचे संचालक डॉ. गणेश राव म्हणाले की, ही परिषद शैक्षणिक संस्था आणि उद्योग क्षेत्र यांच्यातील समन्वय वाढवण्यासाठी अत्यंत प्रभावी ठरली आहे. भविष्यातील सक्षम अॅग्रि-बिझनेस उद्योजक घडवण्यासाठी संस्था कटिबद्ध असल्याचे त्यांनी नमूद केले.
डीन डॉ. मिनाक्षी त्यागी यांनी प्रास्ताविक करताना सांगितले की, ॲग्रीवाईज उपक्रमामुळे शेतकरी, संशोधक आणि ग्राहक यांचे एक उत्कृष्ट नेटवर्क तयार होत आहे. यामुळे तरुण पिढीला पारंपरिक शेतीपलीकडे जाऊन नवीन दृष्टिकोन प्राप्त होईल आणि कृषी क्षेत्रातील आव्हानांवर नाविन्यपूर्ण उपाय शोधण्यास प्रोत्साहन मिळेल.
या सोहळ्यात ‘ॲग्रीवाईज’ मासिकाच्या दुसऱ्या आवृत्तीचे प्रकाशन करण्यात आले. या अंकामध्ये कृषी क्षेत्रातील आधुनिक संशोधन, तज्ज्ञांचे लेख आणि उद्योगातील अनुभवांचा सविस्तर समावेश करण्यात आला आहे.
या कार्यक्रमाच्या यशस्वी नियोजनासाठी प्रा. सागर लोखंडे, प्रा. पूजा माणके आणि प्रा. प्राजक्ता सांधिकार यांनी परिश्रम घेतले. पीसीइटीचे अध्यक्ष ज्ञानेश्वर लांडगे, कुलपती हर्षवर्धन पाटील आणि कार्यकारी संचालक डॉ. गिरीश देसाई यांनी आयोजक टीमचे अभिनंदन केले.
© २०२६ मॅक्स मंथन डेली न्यूज. सर्व हक्क राखीव।
